Erkin kúresten álem chempıonatynda Edige Qasymbek altyn medalǵa talasady

ASTANA. KAZINFORM — Bolgarııanyń Samokov qalasynda ótip jatqan 20 jasqa deıingiler arasynda erkin kúresten alǵashqy jarys kúniniń nátıjesi belgili boldy.

El quramasynan Edige Qasymbek (125 keli) fınalǵa deıin jetti. Endigi onyń qarsylasy — ırandyq Mohammad Neza. Fınaldyq beldesý búgin, 18 tamyzda Astana ýaqytymen 20:00–de bastalady. 

Sondaı-aq Dosjan Qul-Ǵaıyp (74 keli) pen Samır Dýrsýnov (97 keli) jubanysh beldesýinde kúresedi. 

Aıta ketsek, qazaqstandyq bapkerler álem chempıonatyna atalǵan úsh balýannan ózge Nurdanat Aıtanov (57 keli), Allan Oralbek (61 keli), Eraly Jeńisov (65 keli), Suńqar Seıdahmet (70 keli), Erhan Ábil (79 keli), Qasymjomart Álın (86 keli), Kamıl Kýrýglıev (92 keli) syndy sportshylardy alyp bardy.

17-24 tamyz aralyǵynda ótetin bedeldi básekede qazaqstandyq balýandar áıelder kúresinen, grek-rım jáne erkin kúresten el namysyn qorǵaıdy. Aldymen erkin kúres sheberleri boz kilemge shyqsa, odan keıin áıelder kúresinen júldeler sarapqa salynady.

Álem chempıonatyn grek-rım kúresiniń balýandary túıindeıdi.

Dúnıejúzilik doda 1969 jyldan beri turaqty túrde ótkizilip keledi. Qazirge deıin qazaqstandyq balýandar 10 altyn, 27 kúmis, 39 qola medal aldy. 

Byltyr Ispanııanyń Pontevedre qalasynda ótken álem chempıonatynda el quramasy 2 altyn, 1 kúmis, 4 qola júldemen medaldar kestesinde tórtinshi orynǵa turaqtady.