Erkin kúres: Nurqoja Qaıpanov pen Bolat Saqaev Azııa chempıonatynyń fınalyna shyqty

ASTANA. KAZINFORM - Erkin kúres sheberleri Nurqoja Qaıpanov pen Bolat Saqaev Ammanda (Iordanııa) ótip jatqan Azııa chempıonatynyń fınaldyq kezeńine joldama aldy.

Aldymen bozkilemge shyqqan Nurqoja Qaıpanov 74 kelige deıingi salmaqta sátti óner kórsetti. Ol jartylaı fınalda ırandyq Mohammad Reza Shakerıdi 6:1 esebimen qapy qaldyrdy. 

86 kelige deıingi salmaqta synǵa túsken Bolat Saqaev ta (86 kg) Iordanııa astanasynda ótip jatqan Azııa chempıonatynyń fınalyna ótti. Otandasymyz jartylaı fınalda qytaılyq balýandy 12-1 esebimen jeńdi. Endi Saqaev fınalda Iran balýanymen beldesedi.

Aıta keteıik, fınaldyq beldesýler Astana ýaqytymen 20:00-de bastalady.

Ókinishke qaraı, 92 kelige deıingi salmaqta Azamat Dáýletbekov fınalǵa shyǵa almady. Jartylaı fınalda ırandyq balýanǵa 12:0 esebimen jol berdi. Qazaqstandyq balýan endigi kezekte qola medal úshin kúresedi. 

Eske salsaq, buǵan deıin Qytaıda turatyn qandasymyz Kabıran Abýshaımanuly Iordanııa astanasy Amman qalasynda ótip jatqan Azııa chempıonatynda qola medal enshilegenin jazǵan edik.