Erkin Tuqymov: QSZI-da qyzmet etetin adamdar – bizdiń basty qundylyǵymyz

Іs-shara QSZI qara shańyraǵynda, 30 jyl buryn ınstıtýttyń irgesi qalanǵan ǵımaratta uıymdastyrylyp, oǵan ınstıtýttyń burynǵy qyzmetkerleri men ardagerleri, zertteý uıymdary men taldaý ortalyqtarynyń jetekshileri qatysty. «Qazaqstannyń strategııalyq damýynyń saraptamalyq qamtamasyz etýine QSZI qosqan úlesi» atty dóńgelek ústeldi QSZI dırektory Erkin Tuqymov ashty.

«Mereıtoı – atqarylǵan jumysty qorytyndylaý úshin jaqsy sebep. Myń shaqyrymdyq jol bir qadamnan bastalady. Bizdiń ınstıtýt 1993 jyly Prezıdent Jarlyǵymen quryldy. Eń aldymen, bul – QSZI-dyń negizin qalaǵan, ınstıtýttyń tuńǵysh dırektory Ómirserik Qasenovtyń eńbegi. Biz jaqynda muraǵatty aqtarǵanda ol kisiniń ınstıtýttyń qurylýyna, qurylymyna qanshalyqty strategııalyq turǵydan qaraǵanyna kózimiz jetti. Biz QSZI-dyń qurylymy men zertteý baǵyttarynyń barlyǵyn 30 jylda saqtap qaldyq. QSZI qurylǵannan bastap saraptamalyq jumystyń óte joǵary deńgeıi qoıyldy. Bul ınstıtýttyń jetistigin kórsetti. Osy jyldar ishinde 5 myńnan astam taldamalyq jáne aqparattyq materıaldar jarııalanyp, 663 ǵylymı is-sharalar ótkizildi. Instıtýt qyzmetkerleri 3 384 ǵylymı maqala jarııalap, BAQ-ta 6 myńnan astam ret sóz sóıledi», - dedi ol.

Sondaı-aq, «aqyl-oı ortalyǵynyń» qazirgi kórinisi men quramyn atap ótip, ınstıtýt negizdelgen irgetasty burynǵy dırektorlar qurǵanyn aıtty. Erkin Tuqymov Qazaqstan Respýblıkasy Prezıdenti Arhıviniń dırektory Álııa Mustafınaǵa «QSZI 30 jyl: damý joly» tarıhı-qujattyq kórmesin ótkizýge qoldaý kórsetkeni úshin alǵys bildirdi.

«Damý joly» ataýy berilgen kórmede QSZI tarıhynyń barysyna áser etken alǵashqy qujattar, mańyzdy buıryqtar, ataýly oqıǵalar men is-sharalardyń fotosýretteri bar. Sonymen qatar, ınstıtýt shyǵarǵan sońǵy basylymdar, kitaptar, monografııalar men jýrnaldar usynyldy.

«QSZI-da ańǵarǵanym – eń aldymen adamdarǵa degen qurmet, ekinshisi – aldymen ózine, odan keıin qyzmetkerlerge qoıylatyn joǵary talap. Meniń aldymda úlken mindet turdy, bul – bilikti adamdardy, kásibı mamandardy tabý. QSZI-dyń qazirgi qyzmetine qarasam, ınstıtýt durys jolda dep oılaımyn. Ómirserik Qasenovtan bastaǵan serpin qazir de jalǵasyp, ınstıtýt ózine júktelgen mindetterdi oryndap jatyr. Eń bastysy – «kókjıektiń ar jaǵyna qaraý». Sarapshy aldyn ala ne bolatynyn boljap, jaǵymsyz saldardy qalaı azaıtýǵa bolatyny týraly usynys berip, respýblıkamyz úshin, halqymyz úshin ne isteý kerek ekenin bilý qajet», - dedi Qazaqstan strategııalyq zertteýler ınstıtýtyn 2005-2014 jyldar aralyǵynda basqarǵan Bolat Sultanov.

Qonaqtardyń qatarynda Frıdrıh Ebert qorynyń eldik dırektory Aleksandr Volters boldy.

«Saıasat pen qoǵamdy taldaý – Qordyń kúndelikti jumysynyń bóligi. Yntymaqtastyqtyń 30 jyly ishinde biz QSZI-men birlesip jıyrmaǵa jýyq is-shara ótkizdik. Túrli taqyryptarda kezdesý ótkizip, qarym-qatynasymyzdy damyttyq. QSZI ujymynyń joǵary kásibıliginiń arqasynda bizdiń barlyq birlesken is-sharamyz óte joǵary deńgeıde ótti. Biz osy jyldar ishinde qol jetkizgen jetistikterimiz – ınstıtýttyń joǵary kásibı ujymymen tyǵyz yntymaqtastyqtyń, ashyq jáne dostyq qarym-qatynastyń nátıjesi ekenin anyq túsinemiz», - dedi ol.

Іs-sharaǵa qatysqan spıkerler arasynda D. Eleýkenov, K. Hafızova, S. Ákimbekov, N. Seıdın, Z. Jamyhanova, R. Qadyrjanov, Ú. Nysanbek, V. Nohrına, E. Pastýhov, M. Spanov, L. Gýseva jáne basqalar boldy. Olar QSZI-daǵy jumys jyldary týraly, ınstıtýt qalyptasýynyń ártúrli kezeńderi týraly, qazirgi tańda «aqyl-oı ortalyǵyna» qandaı úmit artyp otyrǵany týraly aıtty. Sonymen qatar, QSZI-dyń «kadrlar ustahanasy» retinde qosqan úlesin atap ótti. Qyzmetkerlerge qoıylatyn joǵary talaptardan turatyn kadrlyq saıasat jáne daryndy taldaýshylar men ǵalymdardy izdeý ınstıtýtty erekshelendiredi.

«QSZI-da qyzmet etetin adamdar – bizdiń basty qundylyǵymyz», - dedi Erkin Tuqymov óz sózinde.

Іs-shara sońynda ınstıtýt ardagerleri men seriktesterine Alǵys hat pen estelik syılyqtar tabystaldy.