Erkin ózgermeli aıyrbastaý baǵamy saıasatyn jalǵastyramyz - Ulttyq bank tóraǵasy
ASTANA. QazAqparat - QR Ulttyq banki erkin ózgermeli aıyrbastaý baǵamy rejimin ustanýdy jalǵastyrady. Bul týraly búgin Úkimet otyrysynda atalǵan bank tóraǵasy Erbolat Dosaev aıtty, dep habarlaıdy QazAqparat tilshisi.
Ulttyq banki basshysy 11 naýryzdaǵy jaǵdaı boıynsha teńge baǵamy bir AQSh dollary úshin 379,48 teńge bolǵanyn atap ótti.
«Qazaqstan Ulttyq banki erkin ózgermeli aıyrbastaý baǵamy rejimin ustanýdy jalǵastyrady. Ulttyq banktiń valıýta naryǵyndaǵy netto-ınterventsııalarynyń kólemi 2019 jylǵy aqpanda nólge teń boldy», - dedi ol.
E. Dosaevtyń aıtýynsha, Ulttyq banktiń altyn-valıýta rezervteri 1 naýryzda aldyn ala derekter boıynsha 29,2 mlrd AQSh dollary, Ulttyq qordyń aktıvteri 59,0 mlrd AQSh dollary boldy. Jalpy halyqaralyq rezervter 88,2 mlrd AQSh dollaryn qurady.
Sondaı-aq ol 2019 jylǵy qańtarda depozıtter kóleminiń 19,2 trln teńgege deıin 3,7 paıyzǵa óskenin atap ótti. Ulttyq valıýtamen depozıtter 11,9 paıyzǵa artty.
«Kóp jaǵdaıda mundaı ósý «Tsesnabank» AQ-ny qoldaý boıynsha is-sharalardy iske asyrýǵa baılanysty boldy. Shetel valıýtasymen depozıtter 5 paıyzǵa tómendedi. Nátıjesinde, depozıtterdi dollarlandyrý 44,4 paıyzǵa deıin kemidi», - dedi ol.
