Erkin kúresten Azııa chempıonatyna qatysatyn sportshylar belgili boldy
NUR-SULTAN. QazAqparat - Erkin kúresten Azııa chempıonatyna qatysatyn ulttyq qurama músheleri belgili boldy. Bul balýandar 23-29 sáýirde Qytaıdyń Qytaıdyń Sııan qalasynda kúres túrlerinen jalaýyn jelbiretetin qurlyqtyq dodada el namysyn qorǵaıdy, dep habarlaıdy QazAqparat tilshisi.
Erkin kúresten ulttyq quramanyń bas bapkeri Áset Serikbaevtyń aıtýynsha, atalmysh jarysta negizinen jastarǵa senim artylady. Olar bıyl Shymkent qalasynda ótken spartakıada barysynda iriktelgen. Spartakıadada chempıondyq ataqqa qol jetkizgen balýandardyń barlyǵy derlik Azııa chempıonatynda boz kilemge shyǵady.
Aldaǵy ýaqytta elimizde Olımpıadaǵa lıtsenzııa beriletin álem chempıonaty ótedi. Sol jarysta qazaqstandyq balýandar joǵary deńgeıde oıyn kórsetýi úshin Azııa chempıonatynda olardyń daıyndyq barysy pysyqtalady.
Bas bapkerdiń aıtýynsha, kishi salmaqtarda Japonııa, Ońtústik jáne Soltústik Koreıa balýandary qarymdy keledi. Sondaı-aq, Iran men Ózbekstan balýandary da ońaı qarsylas emes. Soǵan qaramastan bizdiń jigitter negizinen júldeli oryndarǵa talasýdy aldyna maqsat etip otyr.
Erkin kúresten Azııa chempıonatyna qatysatyn Qazaqstan quramasyna Meırambek Qartbaı (57 keli), Baýyrjan Tórebek (61 keli), Dáýlet Nııazbek (65 keli), Nurqoja Qaıpanov (70 keli), Danııar Qaısanov (74 keli), Ǵalymjan Óserbaev (79 keli), Ádilet Daýlanbaev (86 keli), Eraly Ábdirashev (92 keli), Álisher Erǵalı (97 keli) jáne Oleg Boltın (125 keli) shaqyrtý alǵan.
Kúres túrlerinen Qazaqstan quramalary búginde AІVA sporttyq bazasynda jattyǵýda daıyndyǵyn júrgizip keledi. Qurama músheleri 20 sáýirde Qytaıǵa attanady.
