Erkin kúresten Azııa chempıonaty: 4 qazaqstandyq fınalǵa joldama aldy
ASTANA. QazAqparat – Búgin, 14 sáýirde erkin kúresten Azııa chempıonatynyń ekinshi oıyn kúninde fınalǵa 4 balýan joldama aldy, dep habarlaıdy QazAqparat tilshisi.
Bul kúni 61, 74, 86, 92 jáne 125 kelige deıingi salmaq dárejesindegi sportshylar kúresti.
Olardyń arasynan Darhan Esenǵalı (74 keli), Azamat Dáýletbekov (86 keli), Rızabek Aıtmuhan (92 keli), Júsip Batyrmurzaev (125 keli) fınalǵa deıin jetti.
Al Nurbolat Ábdýalıev (61 keli) jubanysh beldesýine qatysady. Jeńip jatqan jaǵdaıda qola júlde úshin saıysqa túsedi.
Eske salsaq, grek-rım kúresinen Azııa chempıonatynda el quramasy jalpy esepte 3-orynǵa turaqtady. Enshisinde 1 altyn, 2 kúmis jáne 5 qola medal bar.
Sondaı-aq áıelder kúresinen qazaqstandyq balýandar 2 altyn, 3 qola medalmen tórtinshi oryn aldy.
Al erkin kúresten jarystyń alǵashqy kúninde qorjynǵa 2 altyn, 1 qola tústi.
