Erkin kúres: Nurıslam Sanaev Álem chempıonatynda ekinshi oryn aldy
ASTANA. QazAqparat - Býdapeshtte kúres túrlerinen ótip jatqan Álem chempıonatynda qazaqstandyq Nurıslam Sanaev kúmis júldeger atandy, dep habarlaıdy QazAqparat Olympic.kz saıtyna silteme jasap.
Erkin kúresten 57 keli salmaq dárejesinde beldesken Nurıslam fınalda reseılik balýan Zaýr Ýgýevten 3:4 esebimen utyldy. Sońǵy upaıdy ıelenip, chempıondyq ataqqa bir taban jaqyn turǵan Sanaevqa tóreshiler kútpegen jerden eskertý berdi. Al qalǵan 13 sekýndta bizdiń sportshy upaı alyp úlgergen joq.
Buǵan deıin habarlaǵanymyzdaı, Nurıslam Sanaev alǵashqy beldesýde Samoadan kelgen balýandy jeńdi. Al 1/8 fınalda 10:0 esebimen ýkraındyq sportshydan aılasyn asyrdy. Shırek fınalda ol 11:6 esebimen Túrkııa ókilinen basym tústi. Jartylaı fınalda amerıkalyq Tomas Gılmandy (11:0) jeńip, aqtyq básekege joldama aldy.
Erkin kúresten el namysyn qorǵap jatqan ózge balýandar júldege ıe bola almady.
Aıta keteıik, Sanaev Azııa chempıonattarynyń «altyn» jáne «qola» medal ıegeri. Al Rıoda ótken sońǵy Olımpıadada 12-inshi oryn aldy.
Vengrııanyń Býdapesht qalasynda kúres túrlerinen Álem chempıonaty qazannyń 20-28 aralyǵynda ótedi. Jarysty alǵashqy bolyp erkin kúres balýandary bastady. Odan keıingi kúnderi bozkilemge boıjetkender shyqsa, dodany grek-rım kúresiniń sheberleri aıaqtaıdy. El namysyn 28 balýan qorǵaýda.
