Erkin kúres: Qazaqstannyń áıelder quramasy Delıde ótetin Azııa chempıonatyna qatysady
ASTANA. Mamyrdyń 6-sy. QazAqparat /Ernur Aqanbaı/ - Erkin kúresten Qazaqstannyń áıelder quramasy mamyrdyń 14-de Úndistan astanasy Delıde bastalatyn Azııa chempıonatyna qatysady,
dep habarlaıdy QazAqparat.
«Bizdiń sport» saıtynyń málimetinshe, alaıda bul birinshilikke bizdiń komandanyń kóshbasshylary - Beıjiń olımpıadasynyń qola júldegeri Elena Shalygına men Tatıana Bogatıýk qatyspaıdy. Quramanyń bas jattyqtyrýshysy Sarjan Jaqsybekovtyń aıtýynsha, T. Bogatıýk Azııa chempıonatyna jaraqatyna baılanysty qatyspaıdy, Al, E. Shalygına bolsa Azııa oıyndaryna tyńǵylyqty daıyndalyp jatyr. Sebebi, bul jarystyń dárejesi qurlyqtyq týrnırden joǵary. Elena úshin Azııa chempıonatyna qaraǵanda, Azıadada tabysty óner kórsetý mańyzdy bolyp tur. Al, Azııa chempıonatynda jas sportshylardy synaıtyn múmkindik týyp otyr. Delı kileminde el namysyn Eleonora Ábýtálipova, Juldyz Ishımova, Aıym Ábdildına, Merýert Dyńbaeva, Olga Kalınına jáne Olga Jánibekova qorǵaıdy. Qazaqstan quramasy úzdik úshtiktiń qatarynan tabylýdy kózdep otyr.
Bizdiń qurama chempıonat aldyndaǵy birinshi daıyndyǵyn Bakýde ótkizgen, al sáýir aıynyń sońynda birneshe quramamen birge halyqaralyq týrnırge qatysqan. Ol aıaqtalǵasyn Almatyda oqý-jattyǵý jıynyn ótkizgen.
