Erkin kúres: Balýandarymyz álem chempıonatyn 1 «kúmispen» aıaqtady
ASTANA. QazAqparat - Býdapeshtte ótip jatqan kúres túrlerinen álem chempıonatynda erkin kúres sheberleri jarysty bir kúmis medalmen aıaqtady, dep habarlaıdy QazAqparat tilshisi.
QR Kúres túrleri federatsııasy baspasóz qyzmetiniń habarlaýynsha, erkin kúresten sońǵy jarys kúni boz kilemge shyqqan 97 kelidegi balýanymyz Mámed Ibragımov jubanysh synynda makedonııalyq Magomedgadjı Nýrovtan 2:5 esebimen utylyp qaldy. Bul salmaqta reseılik Abdýlrashıd Sadýlaev chempıon atandy.
Osyǵan deıin erkin kúresten 57 kelidegi Nurıslam Sanaev álemdik synnyń kúmis júldesin ıelengeni týraly jazǵan bolatynbyz.
Erkin kúresten qorytyndy esepte 4 altynǵa qol jetkizgen Reseı quramasy kósh bastady. Al bizdiń enshimizde bir kúmis medal ǵana bar.
Erkin kúres sheberlerinen keıin jarys jolyna qyzdar shyqqan bolatyn. Ókinishke qaraı, áıelder kúresinen keshe eshkim júldeli orynǵa qol jetkize almady. Rıo Olımpıadasynyń qola júldegeri Ekaterına Larıonova ekinshi aınalymda kanadalyq sportshydan 0:11 esebimen jeńilis tapty. Al búgin Olımpıadanyń taǵy bir júldegeri Elmıra Syzdyqova estonııalyq Epp Maege qarsy jubanysh beldesýin ótkizedi.
