Erkesh Shákeev uly Safardyń rýhyna kompozıtsııa arnady

ALMATY. QazAqparat - Belgili kompozıtor Erkesh Shákeev uly Safardyń rýhyna arnap qaıyrymdylyq maqsatta áýen jazdy. «Remember me» atalatyn jańa kompozıtsııany brıtan pıanısti Djon Lenehan oryndady. Bul týraly ánshi óziniń Feısbýktegi paraqshasynda málimdegen, dep habarlaıdy QazAqparat tilshisi.

Kompozıtsııa CD Baby mýzykalyq dıstrıbıýtorynyń saıtynda jarııalanǵan.

Birneshe kúnnen soń Itunes, Amazon, Spotify taǵy basqa platformalarda Safardyń rýhyna arnalǵan London Metropolitan Orchestra oryndaýyndaǵy taǵy bir án jaryq kóredi.

«Resmı túrde aıtamyn. Ánderdiń satylymy men júktelýinen túsken qarajat aýyr naýqas balalardyń em-sharasyna jumsalady. Safar az ómir súrdi. 2014 jyly amerıkandyq «Chapman» ýnıversıtetin bitirdi. Ýnıversıtette oqyp júrip-aq, NFFTY festıvalinde «eksperımentaldy kıno» atalymynda eki ret nomınant boldy. Safar oqyǵan mektepte Athenian School(San Francisco) Safar Shákeev atyndaǵy arnaıy qurmet gramotasyn taǵaıyndaǵanyn estip jatyrmyz», - dedi E. Shákeev.

Ákesiniń aıtýynsha, Safar óte meıirimdi qaıyrymdy adam bolǵan.

«Úıi joqtarǵa, janýarlarǵa kómegin aıamaıtyn. Tanystaryna aqysyz vıdeo túsirip, naýqas balalarǵa qarjy jınaý úshin vıdeo jasady. Qaıyrymdylyq sharalarynyń ortasynda júretin. Sportpen de jaqsy shuǵyldandy. Onyń bapkeri Jastalap Sanaýovtyń muryndyq bolýymen Qazaqstan Karate-do federatsııasy Safar atyndaǵy týrnır uıymdastyrdy», - dep jazdy ánshi paraqshasynda.

Esterińizge sala keteıik, Erkesh Shákeevtiń uly Safar Shákeev  byltyr 16 shildede iz-tússiz joǵalyp, 12 kúnnen soń onyń óli denesi Almatydaǵy Esentaı ózeninen tabyldy.