Erkesh Hasen reseılik «Dańqty sát» baıqaýynyń fınalyna qatysady
ALMATY. 17 aqpan. QazAqparat /Erbol Turymbetov/ - Búgin Almatydaǵy Qazaq ulttyq agrarlyq ýnıversıtetinde talantty oryndaýshy, reseılik «Dańqty sát» («Mınýta slavy») telebaıqaýyndaǵy irikteý synynyń jeńimpazy Erkesh Hasenmen kezdesý boldy.
Keshtiń basty keıipkerlerin ýnıversıtet rektory Tilektes Espolov qarsy alyp, jas talanttyń bolashaǵyna shyǵarmashylyq tabys tiledi.
Jeńimpazdyń jetekshisi QR halyq ártisi Marat Omarov QazUAÝ-niń oqytýshy-professorlary men stýdentterine óziniń shákirti Erkesh Hasendi tanystyrdy. «Erkesh Hasendi Máskeý qalasyndaǵy qazylar alqasy men kórermen qaýym jyly qabyldap, úlken qurmet kórsetti», - dedi M. Omarov.
Ónerpaz órenniń ózi de aldaǵy ýaqyttarda elin ónerimen qýanta beretinin aıtty. Ol endi 22 aqpanda Máskeýde ótetin baıqaýdyń aqtyq kezeńine qatysady.
12 jastaǵy Astana qalasynyń turǵyny Erkesh Hasen 2010 jyly Astana qalasy ákiminiń patrıottyq ánder men áleýmettik baıqaýynda Gran-prı ıegeri atandy. Sonymen birge, ol «Aıgólek» atty respýblıkalyq telearnalar baıqaýynyń jeńimpazy.
