Erkektiń jumysy degender kezdesti, biraq mamandyǵyma berik boldym – Qurmetti jol qyzmetkeri Valentına Kovaljı
ZERENDІ. QazAqparat – Valentına Kovaljı elimizdiń qurmetti jol qyzmetkeri. Jol salasynda 20 jyldan astam eńbek etip keledi. Eńbek jolyn qatardaǵy jumysshy bolyp bastap, búginde respýblıkalyq mańyzy bar tasjoldyń qozǵalysyna jaýap beredi.
8 naýryz halyqaralyq áıelder kúni merekesi qarsańynda QazAqparat tilshisi er adamnyń mindetin atqaryp júrgen názik jandy jol qyzmetkerimen áńgimelesken qurǵan edi.
Valentına Kovaljı Aqmola oblysy Zerendi aýdanynyń týmasy. Sol jerde týyp-ósip, otbasyn quryp, jumys istep keledi.
Qazirgi qyzmeti «Qazaqavtodor» JShS Aqmola oblystyq fılaly Zerendi aýdandyq bóliminiń basshysy.
«Alǵash eńbek jolymdy 2001 jyly Zerendi aýylynda joldy kútip baptaıtyn jumysshy retinde bastadym. Meniń mindetim jol, jol belgileri men aıaldamalardy áktep-syrlaý. Araǵa 3 jyl salyp jol sheberi atandym. Endigi ýaqytta joǵary bilim kerek boldy. Basynda orta arnaýly bilimim boldy, keıin joǵary oqý ornyna tústim. 2019 jylǵa deıin jol salasynda sheber jáne aǵa sheber bolyp jumys istep keldim. 2020 jyly men bas ınjener qyzmetine taǵaıyndaldym jáne sol jyly respýblıkalyq jol ýchaskesiniń jetekshisi boldym. Bul salaǵa negizi kútpegen jerden, biraq ózimniń qalaýymmen keldim. Jol salasy maǵan unady, mine 21 jyl boıy eńbek etip kelemin. Qazir jetekshimin, qol astymda jumysshylarym bar. Meniń endigi mindetim jumysty uıymdastyrý, joldy kútip-baptaýǵa qajetti materıaldarmen qamtamasyz etý», - dedi Valentına Kovaljı.
Valentına Kovaljı «Kókshetaý-Atbasar» jáne «Zerendi-Şýchınsk» respýblıkalyq tasjolynyń tirshiligine jaýap beredi. Atalǵan jol ýchaskeleriniń jalpy uzyndyǵy 160 shaqyrymdy quraıdy.
Aıtýynsha, ujymda 30 qyzmetker bar, onyń 3-ýi áıel.
«Jumys josparyn ózim quramyn. Bizdiń maqsat – jolaýshylardyń qaýipsizdigin qamtamasyz etý, jol qozǵalysyna kederginiń bolmaýyn qadaǵalaý jáne biz aýa raıynyń qolaısyzdyǵyna qaramastan jumys isteımiz. Qysta boranda, jazda qaınaǵan shildede biz joldamyz. Kún saıyn jumysqa tańerteńgi 08:00-de kelemin. Tańerteń aldymen mamandardy jınap, kún josparyna kóz júgirtemiz. Jumys josparyna sáıkes ár jumysshy óz mindetin atqarady. Men osy jumysqa kelgende bir qyzym bar edi, qazir 4 qyzym bar. Barlyǵy da boıjetti, kishkentaıym 1 synypqa bardy. Meniń jol salasynda jumys isteıtinime jaqyndarym da, tanystarym da úırengen. Joldasym da túsiniktikpen qaraıdy. Balalarymdy balabaqshaǵa bere sala jumysqa qaıta kirisetinmin. Keıin úıdiń úlkenderi es jıǵan soń, tipti ýaıymdamaıtyn boldym. Osy jyldar ishinde bul jumys saǵan ne úshin kerek, erkektiń jumysy degender kezdesti. Biraq, men mamandyǵyma berik boldym», - deıdi ol.
Sondaı-aq, jumysta túrli kútpegen jaǵdaılardyń bolatynyn aıta kele, sonyń biri týraly aıtty.
«Buryn bizde qyzmettik kólik bolmady. Jolǵa shyǵý kerek bolsa qandaı kólik bar soǵan minip kete beretinbiz. Ol jeńil avtomobıl, aýyr júk kóligi nemese KamAz bolýy da múmkin. Bir ret men jumysta júrgen kezde, jol boıynda jolaýshy áıeldiń tolǵaǵy kelip qaldy. Árıne, biz kómektestik, shuǵyl túrde jaqyn eldimekendegi týý bólimine jetkizdik. Áıteýir aman saý bosandy. Jolaýshylar túrli tótenshe jaǵdaılarǵa baılanysty jol boıynda qalyp qoıyp, bizge habarlasyp jatady. Biz dereý qol ushyn sozamyz. Qazir bizde jylytý beketteri bar. Eger jolaýshy aýa raıynyń qolaısyzdyǵynan jolda qalyp qoısa, bizdiń jumysshylar olardy qutqaryp, jaǵdaı ońalǵan soń ýaqytsha jylytý beketine alyp keledi. Jolaýshylarǵa arnalǵan ýaqytsha bekette kerek jaǵdaı qarastyrylǵan», - deıdi maman.
Valentına Sergeevnanyń sózinshe, otbasynda qazaq jáne orys halqynyń ulttyq merekeleri teńdeı toılanady.
«Naýryzdy da, Pashany da basqa merekelerdi turaqty atap ótemiz. Et asamyz, baýyrsaq pisiremiz. Qazy-qarta, jal-jaıany ózimiz úıden daıyndaımyz. Bos ýaqytymda qys bolsyn, jaz bolsyn otbasymmen tabıǵat aıasyna jıi saıahatqa shyǵamyz. Zerendiniń tabıǵaty sulý, demalysqa arnalǵan oryndar da jetkilikti. Memlekettik tilge kelsek, joldasym qazaq tilin erkin meńgergen, men azdap qana túsinemin. Úlken qyzdarymdy qazaq balabaqshasyna bergem», - deıdi kóp balaly ana.
Názik jandy jol qyzmetkeri kásibi er adamǵa arnalǵan degen túsinikpen kelisedi.
«Er adamdar ujymynda jumys istegen unaıdy. Kóp sóz joq, naqty is. Degenmen erler ujymynyń ózindik ereksheligi bar. Men basshy retinde árdaıym qyzmetkerlerime túsiniktikpen qaraımyn jáne ár jumysshyny jaqynyraq tanýǵa tyrysamyn. Jeke nemese otbasylyq jaǵdaı týyndaǵan sátte múmkindiginshe qoldaý kórsetip, kómektesýge tyrysamyn. Jalpy qyzmetkerlerdi jumysta únemi qoldap otyramyn. Ardager jol jumysshylarynyń aıtýynsha, 3 jyldan artyq jumys istegen adam bul salany tastap kete almaıdy. Meniń jol salasyn tańdaýyma taǵy bir sebep ol – jyldamdyq. Maǵan jol júrgendegi jyldamdyq unaıdy. Jol – ómir ózeni sekildi. Basqasha aıtqanda, jol bolmasa tirshilik joq. Sonymen qatar bizdiń jumysta turaqty, bekitilgen keste joq. Biz kez kelgen ýaqytta jolǵa shyǵýǵa daıyn turýymyz kerek. Kóbinese jumysymyz aýa raıyna baılanysty», - deıdi ol.
Ótken jyly Valentına Kovaljı Qazaqstan Respýblıkasynyń «Qurmetti jol qyzmetkeri» atty memlekettik nagradamen marapattaldy. Osylaısha jol salasyndaǵy 20 jyldyq eńbegi elendi.
Aıta keteıik, tamyz aıynyń alǵashqy demalysy elimizde «Jol qyzmetkerleri kúni» retinde atalyp ótedi.
«Men byltyr «Qurmetti jol qyzmetkeri» ataǵyn aldym. Men úshin odan artyq syı joq. Balalarymnyń mamandyq tańdaýyna kómektesemin. Úlken qyzym dáriger, ekinshi qyzym muǵalim mamandyǵyna oqyp jatyr. Úshinshi qyzymdy sport sektsııasyna berdim, onyń ishki ister organynda jumys istegenin qalaımyn. Al kenjem 1 synypta oqıdy, mamandyq tańdaýǵa erteleý. Meniń mamandyǵyma kelsek, jalpy qyz balasyna jol qyzmetkeri bolýǵa keńes beremin, eger osy saladaǵy qıyndyqqa daıyn bolsa, árıne. Jol jumysshysy bolý úshin erik-jigermen qatar minez kerek. Áıel adam úshin taǵy bir qıyndyq, bizdiń mamandyq ol dalalyq jumys. Kabınette otyrý degen joq, kez kelgen ýaqytta bir jaǵdaı bolyp qalýy múmkin. Barlyq otbasy birdeı túsinistikpen qaraı bermeıdi. Eger joldasy men otbasy qoldasa, názik jandarǵa jol salasynda jumys isteýge keńes beremin. Onyń ústine sońǵy jyldary memleket tarapynan joldyń sapasyna erekshe kóńil bólinip jatyr», - dedi ol.
Qurmetti jol qyzmetkeriniń málimdeýinshe, jolaýshylar ártúrli bolady.
«Neshetúrli jolaýshylar kezdesedi. Ár adam ártúrli. Kóp jaǵdaıda jolaýshylar jol boıynda qalyp qoısa, oǵan ózderin kinálamaıdy. Dalada turyp qalǵany úshin kináni bireýden izdep jatady. Al bizdiń mindet jolaýshyny qutqarý, kómektesý. Árıne, jolaýshylar alǵysyp bildirip jatady», - deıdi V. Kovaljı.
