«Erkektiń densaýlyǵy qanshalyqty myqty bolsa, otbasy da sonshalyqty baqytty» - respýblıkalyq basylymdarǵa sholý
***
«Egemen Qazaqstan» gazetiniń búgingi sanynda «Alataý etegindegi palma» atty maqala jaryq kórdi. «Búginde eshteńege tań qalýǵa bolmaıdy. Alma ósetin Alataýdyń eteginde qazir palma men lımon jaıqalyp tur degenge siz senesiz be? Al, men óz kózimmen kórdim. Jalpy, Ońtústikte taý jaǵalaı ornalasqan Túlkibas, Saıram, Tólebı, Qazyǵurt aýdandarynda tabıǵaty erekshe, týrızmdi túletýge tilenip turǵan tamasha jerler óte kóp. Áıtse de oblys ortalyǵyna jaqyn ornalasqandyqtan bolar, Tólebıdiń taýyndaǵy týrızmniń tynysy basqalaryna qaraǵanda, eptep ereksheleý»,-dep jazady maqala avtory. «Sońǵy jyldary Tólebı aýdanynda týrızm máselesi kúrt damyp keledi. Osy taý qoınaýynan jer ýchaskesin suraýshylar, sol jerge demalys, basqa da saýyqtyrý, halyqqa qyzmet etý oryndaryn salyp, bıznesti órkendetemin degender kóp. Bul bir jaǵy, taýdyń qalaǵa jaqyn ornalasqany, ekinshi jaǵy aýdanda tirlik etemin degen janǵa jaǵdaıdyń bar ekeni, jol, kólik qatynasy, baılanys, basqa da máselelerdiń birshama táýir jolǵa qoıylǵanynan shyǵar dep oılaımyn», deıdi Tólebı aýdanynyń ákimi Áýelhan Turǵymbekov.
Osy basylymnyń jazýynsha, Parıjde Qazaqstan Respýblıkasy Memlekettik qyzmet isteri agenttiginiń tóraǵasy Á.Báımenovtiń Frantsııanyń Memlekettik basqarý jáne memlekettik qyzmet jónindegi bas dırektory J.Verdemen kezdesýi ótip, onyń barysynda taraptar Qazaqstan men Frantsııa memlekettik qyzmetiniń modelderi týraly aqparattarmen almasty jáne memlekettik qyzmet salasyndaǵy yntymaqtastyqtyń ekijaqty jáne kópjaqty máselelerin talqylady. Taraptar memlekettik qyzmet salasyndaǵy ekijaqty yntymaqtastyqty jańa deńgeıge kóterýge ýaǵdalasty. Osy maqsatta jaqyn arada qol qoıylady dep josparlanyp otyrǵan Ózara túsinistik týraly memorandýmnyń negizgi erejelerin talqylady. Bul aqparat gazette «Memlekettik qyzmet salasyndaǵy yqpaldastyq» degen taqyryppen berilgen.
***
«Táýelsizdik alǵaly beri birshama reformany bastan ótkergenimen, qordalanǵan máseleden túpkilikti aryla almaı otyrǵan salalardyń biri - jer qatynasy. Dál osy salanyń «barmaq basty, kóz qystylyq» dertine belsheden batqandyǵy da sondyqtan bolsa kerek. Degenmen sońǵy ýaqytta jerdi túgendeý jumystary túbegeıli qolǵa alynyp, qaı baǵytta nendeı problema bar ekendigi aıqyndala bastaǵan edi. Keshe Májiliske kelgen jer resýrstaryn basqarý agenttiginiń tóraǵasy Qadyrhan Otarov osy másele jóninde depýtattarǵa esep berdi»,-dep jazady «Alash aınasy» basylymy búgingi sanyndaǵy «Jer daýyn órshitpeı sheshýdiń órkenıetti joly qaısy?» atty maqalada. Erazııa qurlyǵynyń 272,5 mln gektaryn alyp jatqan Qazaqstannyń «qushaǵyna» Batys Eýropanyń Frantsııa, Portýgalııa, Ispanııa, Italııa, Grekııa, Norvegııa, Fınlıandııa sekildi memleketteri túgeldeı syıyp ketedi. Sonymen qatar jer kólemi boıynsha irgeli 10 memlekettiń quramyna kiretin Qazaqstanda bir turǵynǵa shaqqanda 17 gektar, onyń ishinde 1,5 gektar egistik jer tıedi eken. Bul - álemdegi eń joǵary kórsetkishterdiń biri.
«Alash aınasy» gazetiniń jazýynsha, densaýlyqqa, ásirese er azamattar kóp mán bere bermeıdi. Óıtkeni resmı málimetke qaraǵanda Qazaqstandaǵy erkekterdiń teń jartysy san alýan ýrologııalyq aýrýlarǵa shaldyqqan. «Uly sózde uıat joq» degen, jynystyq qatynasta olar ózderin erkin sezine almaıdy. Osy toptaǵy azamattardyń 8 paıyzynda jaǵdaı múldem nashar. Eń soraqysy, er adam der kezinde dárigerdiń kómegine júginbeıdi. Bile bilsek, onyń arty tek otbasy ishindegi urys-keriske ǵana sebep bolmaı, basqa da asa aýyr aýrý-syrqattarǵa ulasyp jatady», - delingen basylymda «Erkektiń densaýlyǵy qanshalyqty myqty bolsa, otbasy da sonshalyqty baqytty» atty taqyryppen jarııalanǵan maqalada.
***
2020 jylǵa deıin Qazaqstannyń aýyl sharýashylyǵyna eń kem degende 10 trıllıon qarjy salynady. Keshe Senatta osy salaǵa qatysty uzaq merzimdi jańa turpatty baǵdarlamany - 2013-2020 jyldarǵa arnalǵan Agroónerkásiptik keshendi damytý baǵdarlamasyn tanystyrǵan Aýyl sharýashylyǵy mınıstri Asyljan Mamytbekov osyndaı málimdeme jasady. «Eń bastysy, Agroónerkásiptik keshen - ekonomıkanyń tolyqqandy salasy, ol tabysty, ınvestıtsııalyq tartymdy salaǵa aınaldy»,-dedi mınıstr. Bul jaıynda tolyq bilgińiz kelse «Aıqyn» basylymyndaǵy «Aýyl sharýashylyǵyna 10 trıllıon qarjy salynady» degen maqalany oqyńyz.
