Erkekter ne erte, ne kesh qyzǵana bastaımyz - Nursultan Nazarbaev
Elbasymen kezdesý barysynda Qazaq-Brıtan tehnıkalyq ýnıversıtetiniń ǵylymı qyzmetkeri Hadıcha Hańyrat 5 tilde sóılep, 3 tilde sabaq beretinin aıta kele, ata-anasynyń ǵylym jolyna túsýine kedergi bolǵanyn atap ótti.
«Sizdiń ata-anańyzǵa da rýhanı jańǵyrý kerek. Kórdiń be? Qazir zaman talaby ózgerdi. Ol ata-ananyń kinási emes. Olardy zaman solaı tárbıeledi ǵoı. Bizdiń ortańǵy jáne odan úlken urpaq bári solaı tárbıelendi. Ol minezimizdi de ózgertýimiz kerek. Biz ýaqytymyzdy paternalızm zamanynda ótkizdik. Úıdegi erkek mańyzdy róldi atqardy. «Oǵan barlyǵy baǵynýy qajet. Basqalardyń eshqandaı quqyǵy bolmaýy kerek» degen túsinik áli kúnge deıin bar. Úı ishindegi keleńsizdik, bir-birimen kelispeý bar. Barlyǵy osydan qalǵan. Sodan arylý kerek. Ár adamnyń bas bostandyǵy bolmasa, áıel men eriniń arasynda mahabbat bolmaıdy. Eshkimdi judyraqtap, toqpaqtap súıdire almaısyń, olaı eshkimmen dos ta bola almaısyń. Solaı ǵoı?», - dedi Elbasy.
Memleket basshysy áli kúnge deıin keıbir memleketterde áıelderdiń quqyǵy shektelip otyrǵandyǵyn basa aıtty.
«Keıbir elderde adamdar 30-35 jasynda, kesh úılenedi? Sebebi, áıel materıaldyq turǵyda, qarjy jaǵynan táýelsiz bolýǵa umtylady. Áıel qyzmettik mansabyn jolǵa qoıǵannan keıin otbasyn qurady. Sonda ekeýi de teń quqyly bolady dep esepteıdi. Áıel de, erkek te táýelsiz bolýy qajet. Biz erkekter ne kesh, ne erte qyzǵana bastaımyz. Bul qajet emes qoı», - dedi QR Prezıdenti.
