Erkeǵalı Rahmadıev atyndaǵy fılarmonııanyń orkestri Bishkekte óner kórsetti
ASTANA. KAZINFORM – Bishkektegi T.Satylǵanov atyndaǵy Qyrǵyz ulttyq fılarmonııasynda E.Rahmadıev atyndaǵy Memlekettik akademııalyq fılarmonııasynyń Qazaq orkestri «Dostyq jyry» atty kontsert berdi. Bul týraly Bishkektegi Kazinform agenttiginiń tilshisi habarlaıdy.
Kontsertti orkestrdiń kórkemdik jetekshisi ári bas dırıjeri, Qazaqstannyń halyq ártisi Aıtqalı Jaıymov pen Qazaqstannyń eńbek sińirgen qaıratkeri Nurlan Bekenov basqardy.
Keshte Qazaqstannyń eńbek sińirgen qaıratkeri Svetlana Aıtbaeva, «Qurmet» ordeniniń ıegeri, qobyzshy Janar Júsipova, mádenıet salasynyń úzdikteri Botagóz Táshimova men Amına Boshymova, halyqaralyq baıqaýlardyń laýreaty Aıym Bekbaeva, opera ánshileri Aıgerim Temirbekova men Nurqanat Tapıev óner kórsetti.
Kontserttik baǵdarlamada qazaq halqynyń án-kúıleri men Qazaqstan kompozıtorlarynyń shyǵarmalarymen qatar, kásibı qyrǵyz kompozıtorlarynyń ánderi men kúıleri de oryndaldy.
Keshtiń eń áserli sátteriniń biri – qazaq pen qyrǵyz mýzykanttarynyń dombyra men qomyzda kúı tartysýy boldy. Bul óner saıysy eki halyqtyń dástúrli mýzykasynyń ózara sabaqtastyǵyn aıqyn kórsetti.
Uıymdastyrýshylardyń aıtýynsha, gastroldik sapardyń basty maqsaty – eki el arasyndaǵy tarıhı-mádenı baılanysty nyǵaıtyp, dostyq pen yntymaqtastyqty damytý boldy.
Erkeǵalı Rahmadıev atyndaǵy Memlekettik akademııalyq fılarmonııanyń Qazaq orkestriniń artısi, mádenıet salasynyń úzdigi Seıilhan Sabyrjanuly «Dostyq jyry» kontsertininiń ataýyna erekshe toqtaldy.
– Bul – Qyrǵyzstannyń T.Satylǵanov atyndaǵy Ulttyq fılarmonııa ánshileri men dırıjerleriniń qoldaýymen júzege asyp otyrǵan alǵashqy mádenı bastamamyz. «Dostyq jyry» ataýynyń ózinde úlken mán bar. Sebebi qazaq pen qyrǵyz – tarıhy tamyrlas, mádenıeti men óneri ózara úndes, bir-birine jaqyn halyqtar. Bizdi biriktiretin dúnıe kóp. Búgingi kontsertte E. Rahmadıev atyndaǵy Memlekettik akademııalyq fılarmonııanyń Qazaq orkestrimen birge elimizdiń belgili ónerpazdary da óner kórsetedi, – dedi ol.
Kontsert Bishkek kórermenderiniń ystyq yqylasy men zor qoshemetine bólendi.
Aıta keteıik, Bishkekte Qazaqstan kınosy kúnderi ótip jatyr.
