Erkebulan Seıdahmet «Zenıtke» aýysqysy keledi
ASTANA. QAZAQPARAT - Qazaqstan quramasynyń jáne reseılik «Ýfanyń» shabýylshysy Erkebulan Seıdahmet jattyqtyrýshysy Sergeı Semaktyń sońynan ilesip, «Zenıtke» aýysqysy keletinin aıtty, dep habarlaıdy «SPORTINFORM».
Qazaqstan jáne Ázerbaıjan quramalarynyń joldastyq matchy kezindegi úziliste Seıdahmet Qazsport telearnasy tilshisiniń «Ýfanyń» bas jattyqtyrýshysy Sergeı Semaktyń qyzmetinen ketýi týraly suraǵyna jaýap bere kele, reseılik mamannyń «artynan barýǵa» tyrysatynyn jetkizdi.
«Senim artqany úshin Sergeı Semakqa alǵysym sheksiz. Men odan kóp nárse úırendim. Ony Stanımır Stoılovpen salystyrýǵa bolady, ol da jastarǵa kóp múmkindik beredi. Men áli de kóp eńbektenýge tıispin, sóıtip «Zenıttiń» shaqyrtýyna qol jetkizýim kerek», - dedi Erkebulan Seıdahmet.
