Erkebulan Qaınazarov Astana kúnine oraı ótken aıtystyń bas júldegeri atandy
ASTANA. QazAqparat - Elorda tórindegi Kongress-holl saraıynda Astana kúnine jáne Qazaqstan Respýblıkasynyń 25 jyldyǵyna arnalǵan «Baǵanaly ordam - basty ordam» atty aqyndar aıtysy ótti.
Bul jyr dodasynda elimizdiń eń myqty sýyryp salma aqyndary ózara synǵa tústi. Aıtys jankúıerleri sahna tórinde osy kezge deıin talaı aıtystarda top jarǵan, kópshilikke keńinen tanymal 12 aqynnyń ónerin tamashalady. Sol 12 aqynnyń ishinde Aıbek Qalıev, Sara Toqtamysova, Meıirbek Sultanhan, Aspanbek Shuǵataev, Erkebulan Qaınazar sııaqty sózge sheshen, tilge baı, eliniń ótkeni men búginin tolǵaıtyn oraq tildi, qarsylastaryn ázil jyrlarymen alyp ta, shalyp ta qaǵytatyn shyn júırikter boldy.
Jyr dodasynda 3-orynǵa tórt aqyn laıyq dep tanyldy: Muhtar Nııazov, Bolatbek Orazbek, Jansaıa Mýsına jáne Sara Toqtamysovalar. 4 aqynnyń árqaısysyna 400 myń teńgeden júlde berildi.
2-shi oryndy Meıirbek Sultanhan men Aıbek Qalıev enshiledi. El kóńilinen shyqqan qos shaıyrǵa 500 myń teńgeden júlde berildi.
1-shi orynǵa Ómirjan Kópbosynuly laıyq dep tanylyp, 1 mln. teńgeni qanjyǵasyna baılady.
Bas júldeni astanalyq tanymal aqyn Erkebulan Qaınazar jeńip aldy. Oǵan 2 mln. teńge júlde tartý etildi.
Odan bólek, oryn almaǵan ár aqynǵa 200 myń teńgeden yntylandyrý syılyǵy tabystaldy.
«Baǵanaly ordam - basty ordam» aqyndar aıtysynyń ádil qazylar alqasynyń quramynda tanymal sýyryp salma aqyn, qazaq halqy shyǵarmashylyǵynyń osy bir erekshe túrin zerttep júrgen ǵalym Amanjol Áltaev, QR halyq aqyny Qonysbaı Ábilov, belgili aıtyskerler Dáýletkereı Kápuly, Serikzat Dúısenǵazındar boldy.
Esterińizge sala keteıik, dástúr boıynsha Astana qalasynyń ákimdigi aqyndar aıtysyn Elorda kúnin merekeleý aıasynda osymen onynshy ret ótkizip otyr.
