Erqanat Kópjasaruly: Otbasy ınstıtýtyn nyǵaıtý – memlekettiń rýhanı ımmýnıteti
ASTANA. KAZINFORM – Konstıtýtsııada nekeni er men áıeldiń odaǵy retinde naqtylaý – jaı ǵana quqyqtyq norma emes, bul qoǵamnyń irgeli qundylyqtaryn qorǵaýǵa baǵyttalǵan strategııalyq sheshim. Bul pikirdi jýrnalıst, Konstıtýtsııalyq reforma jónindegi komıssııa múshesi Erqanat Kópjasaruly bildirdi.
Onyń aıtýynsha, bul norma qoǵamda ara-tura týyndaıtyn daýly ári negizsiz pikirtalastarǵa naqty jaýap berip, «Otan – otbasydan bastalady» degen ustanymdy zań deńgeıinde bekemdeıdi. Al munyń túpki máni – urpaq tárbıesiniń durys arnada qalyptasýyna quqyqtyq ári ıdeologııalyq tirek qalyptastyrý.
– Qazirgi álemde qundylyqtar júıesi qubylyp, túrli jat aǵymdar kúsheıip otyrǵan kezeńde memlekettiń otbasy ınstıtýtyna qatysty ustanymy aıqyn ári bultaryssyz bolýy qajet. Nekeni er men áıeldiń odaǵy retinde Konstıtýtsııada naqtylaý – memlekettiń ishki turaqtylyǵyn saqtaıtyn, qoǵamdy ishteı álsiretetin yqpaldarǵa qarsy turatyn ózindik ımmýnıteti, – dedi ol.
Sonymen qatar Erqanat Kópjasaruly otbasy qundylyqtaryn tek Konstıtýtsııaǵa engizýmen shektelýge bolmaıtynyn atap ótti. Normanyń ómirsheń bolýy úshin naqty áleýmettik jáne quqyqtyq tetikter qajet.
– Otbasynyń beriktigi kóbine áleýmettik-ekonomıkalyq jaǵdaıǵa baılanysty. Sondyqtan jas otbasylarǵa arnalǵan jeńildetilgen turǵyn úı baǵdarlamalaryn keńeıtip, kópbalaly otbasylarǵa kórsetiletin áleýmettik qoldaýdy júıeli ári mazmundy etý qajet. Ajyrasýdyń aldyn alý úshin tek sot sheshimine ıek artpaı, medıatsııa men psıhologııalyq qoldaý ınstıtýttaryn memlekettik deńgeıde damytý mańyzdy, – dedi Komıssııa múshesi.
Sondaı-aq bala tárbıesimen aınalysatyn ata-analarǵa, ásirese analarǵa, qashyqtan jumys isteý nemese ıkemdi eńbek kestesin usyný arqyly otbasy men mansapty qatar alyp júrýge jaǵdaı jasaý qajet ekenin aıtty.
– Men jýyrda Qyzylorda qalasynda ótken Ulttyq quryltaıdyń otyrysynda 2026 jyldy «Otbasy jyly» dep jarııalaýdy usyndym. Bul bastama otbasy ınstıtýtyn nyǵaıtýǵa baǵyttalǵan keshendi saıasattyń bastaýy bolýǵa tıis, – dedi Erqanat Kópjasaruly.
Aıta keteıik, osy aptada Prezıdentke Konstıtýtsııanyń qorytyndy mátini usynylýy múmkin.