Eriktiler Sherýbaı, Nura ózenderiniń jaǵasyn qoqystan tazartty

QARAǴANDY. QazAqparat – Abaı aýdanynyń eriktileri Sherýbaı-Nura sý qoımasy jaǵajaıynyń aýmaǵyn tazalady. Eriktiler jergilikti atqarýshy organdardyń kómegimen jaǵajaıdan eki júk kólik toly qoqysty shyǵardy, dep habarlaıdy QazAqparat tilshisi.

Topar kenti jaǵynan sý qoımasynyń jaǵajaıyn tazalaý jyl saıyn júrgiziledi. Ony 23 jastaǵy Temirlan Kákenov basqaratyn «Jastar alıansy» qoǵamdyq birlestigi turaqty uıymdastyrady. Ol eriktilermen jáne aýdannyń janashyr turǵyndarymen birge ártúrli ekologııa aktsııasyn, senbilikter ótkizedi.

«Jaǵajaıdy tazalaý jónindegi aktsııa ótkizý ıdeıasy mektepte oqyp júrgenimde paıda boldy. Men Toparda turamyn, jasóspirim dostarymmen jaǵajaıǵa baramyz. Adamdar qoqysty úıip qaldyryp ketetinin kórip, biz jaǵajaıdy tazartý kerek dep sheshtik. Osylaısha alǵash ret úlken senbilik uıymdastyryldy. Sodan keıin bul jyl saıynǵy dástúrge aınaldy. Ekolog mamandyǵyn oqyǵanmyn, eger qazir eshteńe jasamasaq, onda biz qoqysqa batyp ketetinimizdi túsinemin. Osy maýsymda úsh úlken senbilik ótkizildi. Sońǵysynda eki júk kóligimen qoqys shyǵardyq», – dedi Temirlan Kákenov.

Sondaı-aq, Abaı aýdanynyń eriktileri jergilikti bulaqtyń aýmaǵyn tazartty. Jyl saıyn olar bulaq kóziniń janynan kóp qap qoqys shyǵarady. Temirlan bul aktsııalardyń barlyǵy qysqa merzimdi nátıje beretinin atap ótti.

«Balabaqshadan bastap balalardyń oı-sanasyna ekologııa mádenıetin sińirý qajet. Balalarǵa qoqysty bólek jınaýǵa úıretý kerek. Mektepterde ekologııany oqytý jáne túrli trenıng ótkizý qajet. Eger bizder, jastar qoqys tastaýdy jalǵastyratyn bolsaq, onda ekologııalyq apat bolatynyn túsinýimiz kerek», – dep atap ótti Temirlan.