Eriktiler Semeıdiń sý basqan aýdandaryn qoqystan tazartyp jatyr
SEMEI. QazAqparat - Semeıde sý basqan aýdandardy qoqystan tazalaý jumystary bastaldy, dep habarlaıdy QazAqparat.
200-den astam erikti jas qalanyń sý basqan aýdandarynda tazalyq jumystaryn júrgizip jatyr. Semeı qalasy «Jastar» resýrstyq ortalyǵynyń uıytqy bolýymen uıymdastyrylǵan tazalyq jumystary Túıemoınaq araly aýdany, Bıologııalyq ortalyq mańy, Mırnyı, Prıstan kentinde júrgizildi. Aktsııa aıasynda aýdandardaǵy turǵyn úılerdiń aýlasy men mańy ártúrli turmystyq kúl-qoqystardan tazartyldy. Erikti jastar sý tasqynynan zardap shekken turǵyndarǵa kómek kórsetýdi qaladaǵy tótenshe jaǵdaı aıaqtalǵanǵa deıin jalǵastyrmaq.
«Qaladaǵy oqý oryndarynyń stýdent jastarynan qurylǵan erikti jumysshy jasaqtary 2 sáýirden bastap tazalyq jumystaryn júrgizip jatyr. Mundaǵy maqsat sý tasqynynan zardap shekken turǵyndarǵa kómek kórsetý. Al 4 sáýirden bastap stýdent jastarynyń uıymdastyrýmen dárigerler brıgadasy qurylady. Quramynda bilikti jas dárigerler men psıholog mamandar bar. Atalǵan baǵyttaǵy jumystar qalamyzdaǵy tótenshe jaǵdaı aıaqtalǵanǵa deıin jalǵasady»,-dedi Semeı qalasynyń «Jastar» resýrstyq ortalyǵynyń dırektory Oljas Soǵymbaı.
