Eriktiler Safar Shákeevti izdeý úshin jedel toptar qurdy
ASTANA. QazAqparat - Safar Shákeevti izdeýmen aınalysyp jatqan eriktiler kelip túsken málimetterdi jedel óńdeý úshin ushqyr toptar qurdy.
«Tańerteńgi jumystyń negizgi baǵyttary - Remızovka jáne onyń mańyndaǵy aýdandardaǵy ıesiz qalǵan shıpajaılardy jáne saıajaılardy qarap shyǵý. Sondaı-aq saýaldamany jáne halyqty habardar etýdi jalǵastyramyz, yqtımal kýágerlerdi izdeýdemiz. Erteńnen bastap (22 shilde) qalada kezekshi ushqyr toptar iske kirisedi, olar shyǵýǵa jáne kelip túsken dabyldardy óńdeýge ázir. Biz sizderge kómekterińiz ben qoldaýlaryńyz úshin alǵys aıtamyz», - dep jazdy Facebook-te Shákeevter otbasynyń dosy Vıktorııa Momynbaeva.
Budan buryn eriktiler Remızovka turǵyndaryna Safar Shákeevti izdeýge kómektesý jóninde ótinish jasady. Sonymen birge, joǵalyp ketken jigittiń jaqyndary men tanystary Safardy oǵan deıin kórgen beınetirkeýishter men baqylaý kameralary jazbalary tabylatynyna úmittenedi. Bul - Remızovka baǵytyndaǵy Ál-Farabıden joǵary Seıfýllın aýdany.
Keshe Safar Shákeevti izdeý jónindegi Almatydaǵy shtab jınalatyn jerlerin ózgertkeni belgili boldy, endi eriktiler shańǵy tramplıni aýmaǵynda jınalady.
Aıtqandaı, jas jigitti izdeýge QR ІІM TJK respýblıkalyq jedel-qutqarý jasaǵynyń súńgýshileri de qosyldy, olar Vesnovka ózeni ýchaskesin - Shevchenko kóshesinen Raıymbek dańǵylyna deıingi aýmaqty qamtydy.
Sonymen birge, Safardy qalanyń qutqarý qyzmetteri de izdeýde - 100-den astam polıtseıler men eriktiler iske qosylǵan.
Atap óteıik, belgili qazaqstandyq kompozıtordyń ulynyń qaıda ekeni týraly aqparat úshin 10 mln. teńge tigilgen. Eriktiler Safar Shákeevtiń joǵalǵan kúni kórýi múmkin júrginshiler men júrgizýshiler tabylyp qalýy múmkin dep úmittenýde.
Eske sala keteıik, budan buryn ulyn izdeýge qazaqstandyq belgili kompozıtor, mýzykant, oryndaýshy-avtor Erkesh Shákeevtiń ózi ótinish jasaǵan bolatyn. Safar Shákeevtiń joǵalyp ketkeni týraly habar polıtsııaǵa 16 shilde kúni, keshki saǵat 22 shamasynda tústi. «Bizdiń bólimshe men Almaty ІІD krımınaldyq polıtsııa basqarmasy qyzmetkerlerinen arnaıy tergeý-jedel top quryldy», - dedi budan buryn Medeý aýdany ІІB bastyǵy, polıtsııa polkovnıgi Esen Ysqaqov.
