Eriktiler otbasy: Andreı men Marına Lýtoshkınder volonterlikke qalaı keldi

NUR-SULTAN. QazAqparat – Volonterler qyzmeti týraly kóptegen daqpyrt pen stereotıpter bar. Bireýler onyń qajeti joq dese, keıbiri «qarjylyq tabys ákeletin» ispen aınalysýǵa keńes beredi. «Saǵan qajeti ne?», «Ne úshin?», «Aqsha tólemeıdi ǵoı» degen suraqtar keń taralǵan, alaıda volonterler bul suraqtarǵa úırengen sekildi. Tájirıbeli eriktiler mundaı sózderge tipti mán bermeıdi. Andreı men Marına Lýtoshkınder de – solardyń biri.

Lýtoshkınder januıasy Aqmola oblysy Atbasar qalasynda turady. Baqytty otbasy, úsh balanyń ata-anasy jáne belsendi azamattyq ustanymy bar jandar.

Olar barlyq jobaǵa birge qatysady, bir-birin qoldap, birge damýlaryna járdemdesedi. Olar 2014 jyly volonterlikke kelip, «Tselına» qoǵamdyq qorymen birge jumys bastaǵan.

Qor volonterleri «Samruq-Qazyna» AQ men «Ulttyq volonterlik jeli» ZTB tarapynan jasalǵan «Jeńis» jobasyna, Jas jumysshylar Ulttyq Birlestiginiń «Zhas Project» jáne «Jasa» jas korpýstyń damý jobalaryna qatysqan.

Osy sharalar aıasynda Andreı men Marına oqýǵa qatysyp, sertıfıkat alǵan soń, Nur-Sultan, Kókshetaý, Atbasar qalalarynda, Zerendi jáne Petrovka aýyldarynda jastarǵa arnalǵan trenıng júrgizgen.

Tálimger retinde barlyǵy 9 jastar tobyna járdemdesken.

«Jastar jyly aıasynda mentor-trener retinde damı bastadyq, 2020 jyly óz bastamashyl tobymyzdy qurǵan soń, volonter retinde damydyq» - deıdi Marına.

Ótken jyly volonterlik januıa UNICEF-ke qosylyp, «PlasticFree» baǵdarlamasyna qatysqan. Baǵdarlamanyń maqsaty – birrettik plastıkti qoldanýdy azaıtý mádenıetin taratý.

TJ kezindegi karantınde medıa-volonter retinde jumys istep, «COVID19» jobasy aıasynda shynaıy aqparat taratyp kómektesip júr.

Qazirgi ýaqytta Lýtoshkınder otbasy «Inklıýzıvti qoǵam» atty jańa jobasyn bastap, volonterlik qyzmetin jalǵastyrýda.

«Ótken jyldyń sáýir aıynda «Birgemiz: Sabaqtastyq»» baǵytyndaǵy jalpyulttyq jobalarǵa tálimgerler retinde, «Birgemiz: Asyl Mura» boıynsha – joba volonterleri retinde qatysýǵa ótinim berdik. Paıdaly ári qyzyqty onlaın-oqytýdan qýana-qýana óttik. Jańa ári ózekti dúnıelerdi ıgerdik. Sondaı-aq, bizdiń bastamashyl tobymyz «Birgemiz: Sabaqtastyq», «Birgemiz: Asyl Mura», «Birgemiz: Taza Álem» ı «Birgemiz: Qamqor» baǵyttary boıynsha jalpyulttyq jobalar aıasyndaǵy kishi granttar konkýrsyna 6 túrli ótinim berdi. Bizdiń mentor-volonterlerimiz edáýir jetistikterge jetip jatyr», - deıdi Andreı men Marına.

Lýtoshkınder otbasy grant jeńip alyp, «Trenıng+» jáne «Master-klass» jobalaryn júzege asyra bastady.

Bilim jobalary bala tárbıesinde kómektesýge, balalardyń qajetti daǵdylaryn qalyptastyrýǵa jáne áleýetin jan-jaqty ashýǵa baǵyttalǵan.

Az qamtylǵan otbasynan shyqqan jasóspirimder bazalyq bilim alyp, turmystyq tehnıkalardy jóndeý úshin túrli quraldardy qoldaný qabiletin ıgerý, jáne aspazdyq ónerdi úırený arqyly pozıtıvti damı bastaıdy.

Igerilgen qabilet pen bilim kúndelikti ómirde qoldanýǵa ári bolashaq mamandyqty tańdaýda kómektesedi.

Qazan aıynda otbasy «Samgay» jobasy boıynsha oqýyn aıaqtady, bul – «UpShift» baǵdarlamasy boıynsha jastarǵa formaldy emes bilim berý týraly trenerlerge arnalǵan joba.

«Úsh apta buryn biz Andreı ekeýmiz «Ashyq júrek» respýblıkalyq konkýrsynda eki grant utyp alǵanymyzdy bildik. Bizdiń «Pamıat» jáne «Teplo» atty eki jobamyz da jeńiske jetti. Ekeýi de «Birgemiz: Qamqor» baǵytynda», - deıdi Marına.

Lýtoshkınderdiń aıtýynsha, iri áleýmettik mańyzdy jobalar sany kún saıyn artyp keledi, bastamashyl toptar men volonterlerge degen kózqaras da ózgerýde.

Óz qyzmetiniń arqasynda ekeýi saıahattap, qyzyqty adamdarmen kezdesip, jańa dúnıeler úırenip, praktıkalyq bilim alýda.

Sonymen birge, eriktiler jobalardy júzege asyrýda kóptegen problemaǵa tap bolatynyn da jasyrmady. Alǵashqy sabaqtarda, mysaly, balalardyń beıimdelýimen qıyndyqtar týyndaıdy, sebebi olar eshqashan trenıngke qatyspaǵan jáne uıalady.

«Esepte, qarjylandyrýda qıyndyqtar týyndaıdy, biraq barlyǵynyń sheshimin tabýǵa bolady. Volonter degenimiz – kez kelgen janashyr adam. Ol sıqyrshy da emes, qaharman da emes. Ol basqalarǵa (adamdarǵa, janýarlarǵa, tabıǵatqa, elge) qaıtarymsyz kómek jasaýdyń ómirlik mańyzy bar dúnıe ekenin biledi. Volonterlik – eń birinshi empatııa, jan ashý jáne kóńil bólý, ne isteı alatynyńdy túsiný jáne kómek kórsetý.

Qazir bizde volonterdi – isteıtin tirligi joq jáne tegin jumys isteıtin adamdar dep oılaıdy. Kóp adamdar, ásirese aýyl-aımaqta volonterlik týraly esh habar joq. Biraq báribir basqa jaǵynan qaraý kerek dep oılaımyz. Eriktiler aqy almasa da, salyqtyq tólemder, tegin medıtsınalyq kómek, shet elge tájirıbe almasýǵa barý jáne t.b. artyqshylyqtar alady. Jáne eń bastysy – enbek ótili. Sebebi bul – naǵyz jumys» - dedi keıipkerler.