Eriktiler Abaı oblysyndaǵy órt sóndirýshilerge kómektesip jatyr

Eriktiler Abaı oblysyndaǵy orman órtimen kúresip jatqan mamandarǵa kómek kórsetip jatyr. Bul týraly oblys ákimdiginiń baspasóz qyzmetinen málimdedi dep habarlaıdy QazAqparat.

Órt sóndirý brıgadalaryna qoldaý kórsetý úshin eriktiler aýyldyq okrýgterden ystyq tamaq daıyndap, ákelip jatyr.

«Jergilikti kásipkerlerdiń qoldaýymen búginde 1000 lıtr taza aýyz sý, 200 kg qoı eti, 200 kg jarma, 5 qorap konservi, 1000 nan ónimi, 50 kg pııaz jáne basqa da qajetti ónimder qamtamasyz etildi. Sonymen qatar, jergilikti atqarýshy organdar 4 tonna aýyz sý berdi. Beıjaı qaramaıtyn azamattar órt sóndirýshilerge aýyz sý, plastıkalyq ydys-aıaq, azyq-túlik jáne jeke kútim quraldaryn usynýda. Eriktiler Borodýlıha jáne Ýspenka aýyldarynda ornalasqan dalalyq asúılerdiń jumysyn qoldaıdy», – dep jazylǵan habarlamada.

Ystyq tamaqty úzdiksiz jetkizý úshin 80-ge jýyq erikti kómekke kelgen. Semeı qalasynyń turǵyndary bul jaǵdaıdan tys qalmady. Aıta ketý kerek, órt aımaǵynda tek arnaıy daıyndalǵan mamandar jumys istep jatyr. Qazir qosymsha jumys kúshine qajettilik joq.

Eske salaıyq, búgin Semeı ormanyndaǵy órtti sóndirýge jumyldyrylǵan 14 mamanmen baılanys úzilgen bolatyn. Keıin 3 qyzmetkerdiń qaza tapqany anyqtaldy.

Memleket basshysy Qasym-Jomart Toqaev Tótenshe jaǵdaılar mınıstri ıÝrıı Ilınge oqıǵa ornyna jedel baryp, órt sóndirý jumystaryn basqarý mindetin júktep, kóz jumǵan orman sharýashylyǵy qyzmetkerleriniń otbasylaryna qajetti kómek kórsetýdi tapsyrdy.

«Semeı» ormany rezervatynda órt 8 maýsym kúni shyqqan bolatyn.

Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.