Erikti qonys aýdarý: soltústikke kóshkenderge berilgen materıaldyq kómek buǵattalmaıdy
«Mınıstrlik (Eńbek jáne halyqty áleýmettik qorǵaý mınıstrligi) «Qýatty óńirler – el damýynyń draıveri» ulttyq jobasy aıasynda iske asyrylatyn erikti túrde qonys aýdarýshylardyń esebin jyl saıyn Qazaqstan Respýblıkasy Ulttyq ekonomıka mınıstrligine joldaıdy, sáıkesinshe atalǵan memlekettik organ biryńǵaı operator retinde Úkimetke esep beredi. Sonymen qatar, atalǵan baǵdarlamanyń iske asyrylýy Qazaqstan Respýblıkasy Prezıdenti Ákimshiliginiń, Úkimettiń, Joǵary aýdıtorlyq palatanyń jáne múddeli memlekettik organdardyń turaqty baqylaýynda», - deıdi Úkimet basshysy jaýabynda.
Premer-Mınıstr osy jyldyń mamyrynda Soltústik Qazaqstan oblysynda Memleket basshysynyń erikti túrde qonys aýdarý baǵdarlamasyn iske asyrý máseleleri boıynsha tapsyrmalarynyń oryndalýyna qatysty jergilikti atqarýshy organdardyń qyzmetine keshendi tekserý júrgizilgenin atap ótedi.
«Tekserý nátıjesinde jańa jerde jumysqa ornalasý, beriletin turǵyn úıdiń sapasy, qonys aýdarýshylar atynda kredıttiń kóp bolýy, jergilikti jerlerde aqparattyq-túsindirý jumystyń álsiz bolýy sııaqty máseleler anyqtaldy. Búgingi kúni atalǵan baǵytta máselelerdi sheshý boıynsha jumystar júrgizilip jatyr. Máselen, erikti túrde qonys aýdarýshylardyń otbasyna turǵyn úı alý úshin ekonomıkalyq utqyrlyq sertıfıkatyn berý tetigi iske qosyldy. Atalǵan sertıfıkat turǵyn úıdi satyp alýǵa, salýǵa nemese ekinshi deńgeıli bankterde alǵashqy jarna retinde paıdalaný úshin qonys aýdarýshylardyń otbasyna turǵyn úı qunynyń 50 paıyzy, alaıda 4 mln teńgeden aspaıtyn kólemde beriledi. Bul tetik qonys aýdarýshylarǵa turǵyn úıdi ózdiginen tańdaýǵa jáne sapasyz úılerdiń sheshýge múmkindik beredi», - dedi ol.
Álıhan Smaıylovtyń dereginshe, qonys aýdarýdy yntalandyrý maqsatynda ońtústik óńirlerde soltústik óńirlerdiń jumys berýshilerin tarta otyryp, bos jumys oryndary jármeńkesi ótkiziledi. Mysaly, bıyl Túrkistan, Qyzylorda, Mańǵystaý oblystarynda jáne Almaty qalasynda «AMANAT» partııasynyń fılıaly ókilderiniń qatysýymen bos jumys oryndary jármeńkesi uıymdastyryldy.
«Sonymen qatar, «Qazaqstan Respýblıkasynyń keıbir zańnamalyq aktilerine kóshi-qon salasyndaǵy zańnamalardy jetildirý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy ázirlenip, búgingi kúni Qazaqstan Respýblıkasy Parlamenti Májilisiniń qaraýynda. Bul zań jobasy qabyldanǵan jaǵdaıda soltústik óńirlerge qonys aýdarýshylarǵa jergilikti atqarýshy organdar tarapynan berilgen materıaldyq kómek qarajatyn buǵattamaý máselesi sheshiledi», - dedi Úkimet basshysy.
