Erikkenniń ermegi: « Jalǵan bomba» úshin úsh jylǵa túrmege qamaldy
ASTANA. QazAqparat - Sátpaev qalasynyń sotynda jarylǵysh zat týraly jalǵan aqparat bergen er adamǵa qatysty úkim shyǵaryldy, dep xabarlaıdy QazAqparat tilshisi atalǵan mekemeniń baspasóz qyzmetine silteme jasap.
Sot materıaldaryna sáıkes, 2017 jyly 29 jeltoqsanda E. esimdi azamat Sátpaev qalasynyń ortalyq alleıasynda araq ishken. Sol jerde otyrǵanda oǵan terrorızm áreketi jaıynda jalǵan aqparat berý týraly oı keledi. Sodan kóp oılanbaı, uıaly telefonmen 101 nómiri arqyly qalanyń órt sóndirý bólimine qońyraý shalyp, «Prestıj» dúkeninde bomba bar» dep, telefonyn tastaı salady. Biraq atalǵan aqparat rastalmady.
"Sot sheshimine sáıkes, E. esimdi azamat QR Qylmystyq kodeksiniń 273-baby boıynsha kináli dep tanylyp, úsh jylǵa bas bostandyǵynan aıyrý jazasyna kesildi. Atalǵan merzimdi ol qaýipsizdik deńgeıi joǵary mekemede óteıdi. Sot úkimi zańdy kúshine engen joq", - delingen resmı xabarlamada.
