Erıka Jaılaýova kórkem gımnastıkadan halyqaralyq týrnırde «qola» aldy
ASTANA. QazAqparat – Erıka Jaılaýova kórkem gımnastıkadan halyqaralyq týrnırdiń qola júldegeri atandy, dep habarlaıdy QazAqparat tilshisi.
Sportty damytý dırektsııasynan málim etkendeı, Bolgarııa astanasy Sofııada ótken kórkem gımnastıkadan halyqaralyq týrnır óz máresine jetti. Bul saıysta óner kórsetken Erıka Jaılaýova úzdik úshtikten kórindi. Qazaqstandyq sportshy lentamen óner kórsetýde fınalǵa shyǵyp, 29.350 upaı enshiledi. Degenmen Erıka urshyq, dop jattyǵýlarynda 5-orynǵa turaqtady.
Týrnır qorytyndysyna sáıkes, ýkraınalyq Polına Horodnıcha 30.550 upaımen jeńiske jetse, bolgarııalyq Eva Brezalıeva 30.300 upaımen «kúmis» júlde enshiledi.
Eske sala keteıik, buǵan deıin el sportshysy Eljana Tanıeva kórkem gımnastıkadan álem kýbogi kezeńiniń kúmis júldegeri atanǵan edi.
