Erik Sultanov jastardy sportpen belsendi shuǵyldanýǵa shaqyrdy (FOTO)
ASTANA. QazAqparat - Soltústik Qazaqstan oblysynyń ákimi Erik Sultanov Petropavl qalasyndaǵy jańa sport ǵımarattary qurylysynyń barysymen tanysty.
Eń aldymen óńir basshysy boks mektebi janyndaǵy kópqyzmetti sport alańyna bardy. Nysandy Sport kúninde ashý josparlanǵan. Qazir munda qorytyndy jumystar júrgizilýde. 20 h 30 metr ólshemdi alańnyń ereksheligi onda basketbol, voleıbol, shaǵyn fýtbol oınaýǵa bolady. Sporttyń túrine baılanysty munda belgi qoıylǵan. Alańnyń taǵy bir artyqshylyǵy jaraqatty boldyrmaıtyn sıntetıkalyq jabynmen qaptalǵan.
Petropavl qalasynyń dene shynyqtyrý mádenıeti jáne sport bóliminiń basshysy Valerııa Evdokımenkonyń aıtýynsha, oblysta mundaı alań buryn-sońdy bolmaǵan.
«Munda jasalǵan kópqyzmetti alańnan basqa, taǵy 8 jattyǵý trenajeri ornatyldy. Bul jer qalalyqtardyń súıikti ornyna aınalady degen oıdamyn. Munda tilek bildirýshilerdiń barlyǵy jattyǵa alady. Sol úshin keste jasalatyn bolady», - dedi Valerıı Vasılevıch.
Jańa alańdy synap úlgergen balalar óńir basshysyna úlken rızashylyqtaryn jetkizdi. Óz kezeginde Erik Hamzauly jastarǵa sportty rýh pen tabys tiledi.
«Eki jyl ishinde oblys boıynsha 172 hokkeı qoraby paıdalanýǵa berilse, olardyń 13-i Petropavl qalasynda ornalasqan jáne 3-i jabyq túrde jasalǵan. Sonymen qatar 200 shaǵyn fýtbol alańdary bar. Bulardyń barlyǵy sender úshin, sender sportpen belsendi túrde aınalysýlaryń úshin jasalyp otyr», - dep atap ótti Erik Sultanov.
Al belsendi jastar úshin eski saıabaqta sporttyń ekstremaldy túrimen aınalysýǵa arnalǵan alań ornatyldy. Buryn velomotokross, skeıt sııaqty sportpen aınalysatyn jastarǵa mundaı oryn bolmaǵan edi. Óz máselelerin olar tikeleı óńir basshysyna aıtqan bolatyn. Birneshe apta ótken soń saıabaqta 2 kvoter men 2 fanboks ornatyldy.
Erik Sultanov óńirdiń veloshabandozdary halyqaralyq jarystarda óte joǵary kórsetkishter kórsetip júrgenin, sondyqtan bul sportty jáne onyń túrlerin damytýǵa qashan da úlken kóńil bólinetinin aıtty.
Aıta ketý kerek, búginde VMH sport túri retinde Petropavl qalasynda belsendi damyp keledi. Qala boıynsha 30-dan astam raıderler bar.
Búginde Mádenıet jáne demalys saıabaǵy janyndaǵy dalalyq jattyǵý trenajerlary alańynda jańǵyrtý jumystary júrgizilýde. Bul jer jaraqatty boldyrmaıtyn jabynmen qaptalýda, dep habarlaıdy óńir basshysynyń baspasóz qyzmeti.
