Erik Sultanov Petropavl bazarlaryn aralady
PETROPAVL. QazAqparat - Petropavl qalasyna jasaǵan jumys sapary barysynda Soltústik Qazaqstan oblysynyń ákimi Erik Sultanov bazarlardy aralady, dep habarlaıdy «QazAqparat» HAA tilshisi óńir basshysynyń baspasóz qyzmetine silteme jasap.
Aýylsharýashylyq jármeńkeleri apta saıyn qalanyń birneshe bazarlarynda ótýde. Aýyl turǵyndary óz taýarlaryn naryq baǵasynan 15-20%-ǵa tómen satady. SQO ákimi ónimder men olardyń baǵalarymen tanysty.
Aıta ketken jón, petropavldyqtar qala ákiminiń eseptik kezdesýinde bazarlardaǵy azyq-túlik baǵasy máselesin kótergen edi. Erik Sultanov baǵalardy jeke baqylaýyna alatyndyǵyna ýáde etken.
Óńir basshysy sodan keıin Kırov atyndaǵy zaýytqa bardy. Bul jerde taıaýda arada bilim berý mekemelerine arnalǵan baǵdarlamalyq jasaqtamasy bar 3D-prınterler shyǵarylatyn bolady.
Kásiporyn basshysy Marat Ábilmajınov Erik Sultanovqa 3D-prınterlerdi birlesip óndirý boıynsha eki sheteldik kompanııamen kelisim jasalǵandyǵyn aıtty. Kásiporyn jobany júzege asyrýǵa 2017 jyldyń birinshi toqsanynda kirisedi. 3D-prınterdiń baǵasy shamamen 500 myń teńgeden aspaıtyn bolady.
Oblys ákimi jumys sapary barysynda taǵy bir nysanǵa - salynyp jatqan saýda-saýyqtyrý keshenine kirip shyqty. Ol qaladaǵy 20-móltekaýdanda ornalasqan.
«Torgovaıa kompanııa MDM» JShS dırektory Rasýl Dadashov habarlaǵandaı, jalpy aýmaǵy 23 myń sharshy metrlik ortalyqta sýpermarketter, tórt kınozal, balalar attraktsıony, muz aıdyny, fıtnes-zal jáne basqa da nysandar ornalasady. Rasýl Dadashovtyń aıtýynsha, nysan 2017 jyldyń ekinshi jartyjyldyǵynda paıdalanýǵa berilmek.
