Erik Sultanov aýdan ákimderiniń jumysyn synǵa aldy
PETROPAVL. QazAqparat - Oblys ákimdigindegi jınalysta 2016 jylǵy bıýdjettiń atqarylý qorytyndysy men memlekettik satyp alýlardy ótkizý máseleleri kóterildi, dep habarlaıdy «QazAqparat» HAA tilshisi.
Qarjy basqarmasy basshysynyń mindetin atqarýshy Natalıa Dyshkanttiń aıtýynsha, 36,1 mlrd teńgege josparlanǵan jergilikti bıýdjetke 37,5 mlrd teńge jeke kirister túsken, ıaǵnı bul 103,8%-dy quraıdy. Oblystyq bıýdjettiń negizgi kiris kózin jeke tabys salyǵy qurap otyr. «Oblys ortalyǵy boıynsha jospardan tys 252,4 mln teńge, Taıynsha aýdany - 3,3 mln teńge túsirdi. Aımaqtyń qalǵan aýdandarynda boljam oryndalmady», - dedi Natalıa Dyshkant.
«Men oblys ákiminiń apparat basshysyna kirister boıynsha jospardy oryndamaǵan ákimderge sógis berý týraly buıryq ázirleýdi tapsyramyn», - dedi Erik Sultanov.
Óńir basshysy aýdan ákimderiniń memlekettik satyp alýdy ótkizý jumystaryn synǵa aldy.
Natalıa Dyshkant habarlaǵandaı, bıylǵy jyly jergilikti atqarýshy organdar tarapynan 46,9 mlrd teńge somasyndaǵy 18 777 memlekettik satyp alý josparlanǵan. Bıýdjettik baǵdarlamalardyń oblystyq ákimshileri 22 mlrd teńge somasynda - 7034 memlekettik satyp alýlar belgilegen, sonyń ishinde 11,4 mlrd teńgege 482 tapsyrys jarııalaǵan.
Bıýdjettik baǵdarlamalardyń aýdandyq ákimshileri jalpy somasy 11,8 mlrd teńgelik 10 347 memlekettik satyp alýlar, sonyń ishinde 4,9 mlrd teńgelik 240 tapsyrys jarııalanǵan.
