Erık Pardı: Quryltaı saılaýy Qazaqstanǵa degen halyqaralyq senimdi kúsheıte alady
ASTANA. KAZINFORM — 23 tamyzǵa belgilengen Quryltaı depýtattarynyń saılaýy konstıtýtsııalyq reformalardy iske asyrýdyń jáne Qazaqstannyń jańa ókildi ınstıtýttaryn qalyptastyrýdyń kelesi kezeńi bolady.
Kanadalyq bıznes ókili Erık Pardıdiń pikirinshe, tıimdi ári jaýapty memlekettik basqarý júıesin damytý el azamattary úshin de, halyqaralyq seriktesterdiń senimin nyǵaıtyp, uzaq merzimdi ekonomıkalyq yntymaqtastyqty keńeıtý úshin de mańyzdy.
Xena Distribution kompanııasynyń vıtse-prezıdenti Erık Pardı kásibı qyzmeti aıasynda Qazaqstandaǵy ekonomıkalyq jáne ınstıtýtsıonaldyq úderisterdi muqııat qadaǵalap keledi. Bıyl ol Qazaqstan Respýblıkasynyń Ottavadaǵy Elshiligi uıymdastyrǵan konstıtýtsııalyq reformalar jónindegi dóńgelek ústelge qatysty.
Kanadalyq iskerlik mıssııa quramynda Qazaqstanǵa jaqynda jasaǵan sapary oǵan el damýynyń basym baǵyttarymen tikeleı tanysýǵa múmkindik berdi. Sapar barysynda Erık Pardı memlekettik organdardyń ókilderimen, bıznes basshylarymen jáne túrli jobalardy iske asyrýǵa qatysatyn mamandarmen kezdesti. Onyń aıtýynsha, jınaqtalǵan tájirıbe júrgizilip jatqan reformalardyń mazmuny men olardyń Qazaqstannyń odan ári damýy úshin mańyzyn tereńirek túsinýge kómektesken.
Aldaǵy saılaý naýqanyn osy ózgerister aıasynda baǵalaı kele, Erık Pardı onyń buǵan deıin júzege asyrylǵan konstıtýtsııalyq reformalarmen sabaqtastyǵyn atap ótti.
— Meniń oıymsha, 23 tamyzda ótetin saılaý Qazaqstannyń konstıtýtsııalyq reformalaryn iske asyrýdyń jáne eldiń jańa ókildi ınstıtýttaryn qalyptastyrýdyń kelesi kezeńi bolyp tabylady, — dedi Erık Pardı.
Kanadalyq bıznes ókili memlekettik ınstıtýttardyń sapasyna erekshe nazar aýdardy. Sheteldik seriktester úshin olardyń tıimdiligi, jaýapkershiligi men boljamdylyǵy elge degen senimniń jáne uzaq merzimdi birlesken jobalardy josparlaýdyń mańyzdy alǵysharttary bolyp sanalady.
— Tıimdi ári jaýapty memlekettik ınstıtýttardy odan ári damytý el azamattary úshin ǵana emes, halyqaralyq seriktesterdiń senimin nyǵaıtý, sondaı-aq uzaq merzimdi ekonomıkalyq yntymaqtastyq úshin jańa múmkindikter qalyptastyrý turǵysynan da zor mańyzǵa ıe, — dep atap ótti ol.
Osy turǵyda jańa Quryltaıdy qalyptastyrýdyń máni zań shyǵarýshy bılikti uıymdastyrýmen ǵana shektelmeıdi. Ókildi organnyń turaqty jumysy, qabyldanatyn sheshimderdiń dáıektiligi jáne memlekettik ınstıtýttardyń jaýapkershiligi iskerlik baılanystardy nyǵaıtý men ózara tıimdi bastamalardy iske asyrý úshin qosymsha jaǵdaılar jasaı alady.
Erık Pardıdiń baǵalaýynsha, júrgizilip jatqan reformalardyń nátıjeleri Qazaqstannyń sheteldik seriktestermen, sonyń ishinde Kanadamen ózara is-qımylyna da oń áser etýi múmkin.
— Men bul Qazaqstan damýynyń mańyzdy kezeńi ekenine jáne ol eldiń Kanadany qosa alǵanda, búkil álemdegi seriktesterimen baılanysyn odan ári nyǵaıta alatynyna senimdimin, — dedi Xena Distribution kompanııasynyń vıtse-prezıdenti.
Sózin qorytyndylaǵan Erık Pardı Qazaqstan halqyna aldaǵy saılaýdyń sátti ótýin tiledi.
— Qazaqstan halqyna aldaǵy saılaýdyń sátti ótýin, sondaı-aq odan ári órkendeýin tileımin, — dep qorytyndylady ol.
Osylaısha, kanadalyq bıznes ókili 23 tamyzdaǵy saılaýdy dáıekti ınstıtýtsıonaldyq reformalardyń mańyzdy bóligi retinde baǵalaıdy. Onyń pikirinshe, jańa Quryltaıdyń qalyptasýy memlekettik ınstıtýttarǵa degen senimdi nyǵaıtýǵa, halyqaralyq ózara is-qımyldy keńeıtýge jáne Qazaqstannyń Kanadamen ári basqa da sheteldik seriktestermen uzaq merzimdi yntymaqtastyǵy úshin jańa múmkindikter jasaýǵa yqpal etýi múmkin.
Aıta keteıik, Quryltaı saılaýyn 10 myń qoǵamdyq baıqaýshy baqylaıdy.
