Erigen qar sýy úsh joldy basyp qaldy - Aqmola oblysy

KÓKShETAÝ. QazAqparat - Aqmola oblysy aýdandarynda sý tasqyny saldarynan úsh jolda kólik qatynasy úzildi. Olar: Ereımentaý aýdanynyń Qyzyltý jáne Bestoǵaı aýyldary, Atbasar aýdanyndaǵy Esenkeldi aýyly, dep habarlaıdy QazAqparat tilshisi Aqmola oblysy TJD baspasóz qyzmetine silteme jasap.

Vedomstvonyń málimetinshe, sońǵy kúnderi Aqmola oblysynyń barlyq aýdandarynda aýa temperatýrasynyń kóterilýinen qar kúrt erı bastady.

«Qazgıdromettiń boljamyna sáıkes, sáýir aıynyń ekinshi onkúndiginde aýa temperatýrasy +15-21 gradýsqa deıin kóteriledi dep kútilýde. Bul egistikterdegi qardyń jáne ózenderdegi muzdyń kúrt erýine ákeledi. Aqmola oblysy aýmaǵyndaǵy sý tasqyny burynǵysynsha turaqty shıelenis rejıminde ótýde», - dedi vedomstvodan.

Departament basshysy N.Atyǵaevtyń aıtýynsha, eń kúrdeli sý tasqyny jaǵdaıy Tselınograd jáne Arshaly aýdandarynda qalyptasqan. Sondyqtan 5-9 sáýir aralyǵynda kúsheıtý úshin oblystyń atalǵan aýdandaryna departamentten, sondaı-aq, respýblıkanyń basqa óńirlerinen, Nur-Sultan qalasynan qosymsha kúshter jiberildi. Departament aldyn ala Atbasar jáne Astrahan aýdandaryna da qosmysha kúshter jibergen bolatyn.

«Tselınograd aýdanynda 7-9 sáýirde temperatýranyń kóterilýi, qardyń erýi jáne erigen qar sýynyń aǵýynyń nátıjesinde Qoıandy aýylyndaǵy bes turǵyn úıdi sý basyp, 11 adam evakýatsııalandy, onyń beseýi bala. Qazirgi ýaqytta sý basqan turǵyn úıler joq», - dep atap ótti bas aqmolalyq qutqarýshy.

Arshaly aýdanynda sáýirdiń 8-inde respýblıkalyq mańyzy bar «Ekaterınbor-Almaty» avtojolynan eki shaqyrym jerdegi (aýdandyq mańyzy bar «Donetskoe aýyly – Anar stantsııasy» avtomobıl jolyna qaraı) aýdandyq mańyzy bar jergilikti avtojol ýchaskesinde qarǵyn sý jaıyldy. Anar stantsııasy men Donetskoe aýylynyń turǵyn úılerin sý basý qaýpi týyndady.

Departament basshysy atap ótkendeı, atalǵan aýyldar arqyly ótetin sý ótkizý kanalyn keńeıtý boıynsha jumystar júrgizildi. Nátıjesinde qaýiptiń aldy alyndy.

Budan bólek, «Esil ózeni – Túrgen aýyly» gıdropostynda sý deńgeıi qaýipti belgiden 63 sm asyp túsip, sý tasqyny oryn alǵan. Belgi 513 sm, al qaýipti deńgeıi 450 sm. Sonymen qatar, barlyq ózender boıynsha gıdropostarda sý deńgeıiniń birtindep joǵarylaýy baıqalady.

«Sý tasqyny bastalǵannan beri respýblıkalyq, oblystyq jáne jergilikti mańyzy bar avtojol ýchaskelerinde 21 sý tasqyny men bir jol tósemin sý shaıyp ketýi tirkeldi. Eldi mekenderdi sý basý qaýpi joq. Aqmola oblysy aýmaǵyndaǵy sý tasqyny jaǵdaıy jedel shtabtyń, jergilikti atqarýshy organdardyń, azamattyq qorǵaý organdarynyń jáne QR Tótenshe jaǵdaılar mınıstrliginiń táýlik boıy baqylaýynda», - deıdi departament basshysy.