Erhat Esqalıev dári-dármektiń jetispeýshiligi týraly: Problema sheshildi degen oıdamyn
NUR-SULTAN. QazAqparat – Aýýrhanalardyń dári-dármekke degen suranysy 100 paıyzǵa qanaǵattandyryldy. Odan bólek qazirgi ýaqytta jeke naryqtardy toltyrý jumystary júrgizilip jatyr. Bul týraly «SK-Farmatsııa» JShS Basqarma tóraǵasy Erhat Esqalıev málim etti, dep habarlaıdy QazAqparat tilshisi.
YouTube jelisindegi «El tiregi» arnasyndaǵy tikeleı efırde «SK-Farmatsııa» JShS Basqarma tóraǵasy kompanııanyń qazirgi jumysy qandaı ekenin aıtyp berdi.
«Biz tek memlekettik mekemelerge – aýrýhanalarǵa ǵana jaýaptymyz. Jeke dárihanalardyń bárine jaýaptysyńdar degen pikir qate. Depýtattardyń bárimen sóılestik. Olar da osy sózimizdi rastaı alady. Áıtse de bizden jaýapkershilikti eshkim alyp tastaǵan joq. Qor tómendep, dári-dármek azaıa bastaǵan kezde adamdar jeke dárihanalarǵa júgine bastaǵan. Bul jaǵdaıdyń bolǵanyn moıyndaımyz. Menińshe problema sheshildi. Qazir ákimderdiń bárine jeke naryqty toltyqtyrý mindeti júktelip otyr. Jeke naryqty dári-dármektermen toltyrsaq deımiz. Problema birjolata sheshilýi kerek dep esepteımin. Memlekettik mekemeler tarapynan jeke naryqqa júginý máselesi týyndamaıdy. Bolǵan jáne bolatyn ótinimderge taldaý jasap otyrmyz. Qoımalardyń bárin toltyryp tastadyq», - dedi «SK-Farmatsııa» JShS Basqarma tóraǵasy.
Onyń aıtýynsha, Nur-Sultan, Almaty, Shymkent pen Aqtóbede aılyq normaǵa jeterlik operatsııalyq qoımasy bar kompanııanyń tórt haby jumys isteıdi.
«Aımaqtardaǵy aýrýhanalardyń suranysy 100 paıyz qanaǵattandyryldy. Biraq bul bir aılyq qajettilik. Ótinimderdi qaıta qabyldaýdamyz. Eki aılyq normany da toltyryp qoıarlyq múmkindik bar», - dedi ol.
Eske sala ketsek, Úkimettiń keńeıtilgen otyrysynda Memleket basshysy Qasym-Jomart Toqaev MÁMS qory men «SK Farmatsııa» basshylaryn jumystan shyǵarýdy tapsyrǵan bolatyn.
Al osydan bir apta buryn QR Premer-Mınıstriniń kelisimimen Erhat Esqalıev «SQ-Farmatsııa» JShS basqarma tóraǵasy qyzmetine taǵaıyndalǵan edi.
