Erǵalı Bahaev ShQO Tótenshe jaǵdaılar departamentiniń bastyǵy qyzmetine taǵaıyndaldy
Qazaqstan Respýblıkasy Tótenshe jaǵdaılar mınıstriniń buıryǵymen Shyǵys Qazaqstan oblysy TJ departamentiniń bastyǵy bolyp Erǵalı Bahaev taǵaıyndaldy, dep habarlaıdy QazAqparat mınıstrliktiń baspasóz qyzmetine silteme jasap.
Baspasóz qyzmetiniń málimetterine qaraǵanda, E.Bahaev buryn QR TJM Shtab-departamentiniń bastyǵy qyzmetin atqarǵan.
Ujymǵa jańa basshyny Qazaqstan Respýblıkasy Tótenshe jaǵdaılar vıtse-mınıstri general-maıor Erlan Nurpeıisov tanystyrdy. Ol Erǵalı Bahaevty Tótenshe jaǵdaılar júıesiniń erekshelikterin biletin tájirıbeli jáne saýatty maman retinde sıpattady.
Erǵalı Bahaev 1973 jyly Túrkistan oblysynyń Arys qalasynda dúnıege kelgen. Qazaq bas sáýlet-qurylys akademııasyn «Tehnıkalyq-quqyqtyq saraptama» mamandyǵy boıynsha jáne Qazaqstan Respýblıkasynyń Tuńǵysh Prezıdenti–Elbasy atyndaǵy Ulttyq qorǵanys ýnıversıtetin «Ulttyq Ulandaǵy menedjment» mamandyǵy boıynsha bitirgen. Ulttyq qaýipsizdik jáne áskerı ister magıstri.
Azamattyq qorǵaý organdarynda 1998 jyldan bastap qyzmet etedi, qyzmet jolyn QR TJM áskerı bólimi qutqarý vzvodynyń komandırinen bastady. Odan ári Ońtústik Qazaqstan oblysy TJ departamentinde qyzmetin jalǵastyrdy. 2018-2020 jyldary – Shymkent qalasy TJ departamenti bastyǵynyń orynbasary bolǵan.
