ERG tsıfrlandyratyn 7 myń jumys orny: bosaǵan jumysshylar qaıda barady

ASTANA. KAZINFORM – QazIndustry qazaqstandyq ındýstrııa jáne eksport ortalyǵy» aktsıonerlik qoǵamy basqarma tóraǵasynyń orynbasary Aıdar Qojahmetov ERG kompanııasynyń 7 myń jumys ornyn tsıfrlandyrý eldiń eńbek naryǵyna qalaı áser etetinin aıtty.

- Vıtse-mınıstr Oljas Saparbekov óz baıandamasynda ERG kompanııasy qaýipsiz jáne zııandy sanalatyn 7 myń jumys orny tsıfrlanatynyn aıtty. Bul tsıfrlandlyrý neshe adamdy jumystan bosatady. Basqa jumys ornyna aýystyrylsa, aılyǵy sol deńgeıde saqtala ma? - dep surady jýrnalıst.

Aıdar Qojahmetov tsıfrlandyrý sharasy keıbir jumys oryndaryn qysqartqanyn moıyndady.

- ERG kompanııasynyń quramynda birqatar iri kompanııa bar. Ol – alıýmınıı shyǵaratyn zaýyttar, ferroqorytpa óndiretin zaýyttar, temir kenin óndiretin zaýyttar. Tsıfrlandyrý aıasynda keıbir jumys oryndary ońtaılandyryp jatyr. Biraq bul jerde eń mańyzdy másele – jumys orny men jalaqyny saqtap qalý. Tsıfrlandyrylǵan jumys oryndarynan bosaǵan adamdar korporatıvtik mekemeler arasynda bólinip, basqa qajetti jerlerge qaıta oqytý arqyly baǵyttap jatyr, - dedi ol.

Jańa kásip ıgerý arqyly kompanııa ishindegi basqa mekemelerge aýysqan jumysshylardyń aılyǵy ındeksatsııalanatyn kórinedi.

- Ol jerde jalaqynyń ındeksatsııasy bar. ıAǵnı, jalaqyda qatty bir ózgeris joq. Buryn qandaı jalaqy alsa, basqa jumys ornyna aýysqanda sol mólsherdegi jalaqyny alýy múmkin. Jalpy ERG-de 60 myńnan astam adam jumys isteıdi. Sonyń ishinde 7 myń jumys orny ǵana tsıfrlandyrýdan ótedi. Eńbek kodeksi boıynsha, aılyq kólemin saqtaý talaby bar, - dedi QazIndustry ókili.

ERG kompanııasy 7 myń jumys ornyn tsıfrlandyratynyn jazǵan edik.