ERG Skills International: Qazaqstanda alǵash ret taý-ken metallýrgııa kesheni sheberleri arasynda baıqaý ótti
PAVLODAR. KAZINFORM — Qazaqstanda alǵash ret taý-ken metallýrgııa kesheni kásibı sheberleriniń baıqaýy ótti. Halyqaralyq baıqaýǵa Qazaqstan men Qytaıdyń jetekshi kásiporyndarynyń jáne oqý oryndarynyń 160-tan astam ókili qatysty.
Eurasian Resources Group kompanııasy uıymdastyrǵan ERG Skills International baıqaýy — taý-ken metallýrgııa kesheni ókilderi men stýdentter úshin biregeı alań.
Saıys Pavlodar qalasynyń Aqsý qalasynda uıymdastyryldy. Ony jumysshy mamandyqtary salasyndaǵy kásibıliktiń etalony sanalatyn WorldSkills standarty boıynsha ótkizdi. Jarysqa 160-tan astam konkýrsant pen olardyń tálimgerleri keldi. Olardyń qatarynda Qazaqstannyń taý-ken metallýrgııa salasyndaǵy jetekshi kompanııalary — «Qarmet» AQ, «Altynalmas AK» AQ, «Qazaqmys», ERG kásiporyndarynyń, sondaı-aq Qytaıdyń taý-ken metallýrgııa salasynyń ókilderi bar.
— Qazaqstanǵa elektr montajy jáne ónerkásiptik uıymdar baǵyty boıynsha kásibı sheberler baıqaýyna qatysý úshin keldik. Uıymdastyrýshylar da, qatysýshylar da óte kásibı. Óndiris joǵary deńgeıde. Zamanaýı qural-jabdyqtar qýantty. Óziniń sheberligińdi kórsetý úshin barlyq jaǵdaı jasalǵan, — dedi ERG Skills International qatysýshysy Shansı qalasyndaǵy energetıkalyq kásiptik-tehnıkalyq kolledjdiń oqytýshysy Van Sı.
Qatysýshylar 5 kún boıy saıysqa tústi. Barlyǵy 13 negizgi quzyret, onyń ishinde quıma isi, dánekerleý tehnologııalary, tokarlyq jáne slesarlyq is, óndiristik avtomatıka, elektromontaj, CAD ınjenerlik grafıkasy, zerthanalyq hımııalyq taldaý, eńbek qorǵaý, taý-ken jáne marksheıderlik is, paıdaly qazbalardy baıytý, tsıfrlyq baǵdarlamalyq basqarýy bar stanoktar operatory bar.
— ERG kadrlar daıarlaý ekojúıesin júıeli túrde, mektep partasynan oqytýdan jáne kásibı baǵdarlaýdan bastap, kolledjder men joǵary oqý oryndaryndaǵy bilim berý baǵdarlamalaryna, sondaı-aq bizdiń korporatıvtik ýnıversıtettegi oqytýǵa deıin damytyp keledi. ERG Skills International baıqaýyn ótkizý — osy ekojúıeniń taǵy bir tıimdi elementi. Baıqaýymyz jumys standarttaryn arttyrýǵa jáne bolashaq ekonomıkasyna qajetti jas mamandardyń kásibı quzyretterin damytýǵa yqpal etedi, — dedi Qazaqstandaǵy ERG kompanııasynyń bas dırektory Serik Shahajanov.
Aıta keterligi, bul joly bilim berý baǵytyna erekshe nazar aýdaryldy. ERG Skills International baıqaýyna Kolledjder alıansy men ERG, sondaı-aq basqa da oqý oryndarynyń ókilderi qatysty. Barlyǵy 15 kolledj ben ýnıversıtet ókilderin jiberdi.
— Prezıdentimiz Qasym-Jomart Kemeluly Toqaev osy jyldy «Jumysshy mamandyqtar jyly» dep jarııalady. Búgin biz kórip otyrǵan qatysýshylar men ótkizilip jatqan is-shara jumysshy mamandyǵy — bul elimizdegi shynymen de qurmetti mamandyq ekenin taǵy da bir márte dáleldep otyr. Dıvızıon basshysy retinde men úshin bul óte kópten kútken is-shara. Sebebi osyndaı jáne Eýrazııalyq toptaǵy basqa da kóptegen is-sharanyń arqasynda jastardy damytyp, olardyń kásibı daǵdylaryn arttyryp kelemiz. Mańyzdy jaıttardyń biri — biz shyn máninde birtutas úlken jumysshy otbasyna aınalyp kelemiz, — dedi «Qazhrom» TUK» AQ bas dırektory Sergeı Prokopev.
ERG Skills International baıqaýynyń ótkizilýi Eurasian Resources Group kompanııasynyń tehnıkalyq jáne kásiptik bilim berý júıesin jańǵyrtýdaǵy, sondaı-aq Qazaqstannyń taý-ken metallýrgııa keshenine kadrlar daıarlaýdyń úzdik halyqaralyq tájirıbelerin ilgeriletýdegi kóshbasshylyǵyn taǵy da dáleldedi.
— Men «Qazhrom» TUK» AQ-tyń Dóń taý-ken baıytý kombınatynan keldim. «Paıdaly qazbalardy baıytý» quzyrettiligi boıynsha qatysýshymyn. Buǵan deıin Aqtóbe ferroqorytpa zaýytynda bolǵanmyn, al Aqsý zaýytyna alǵash ret kelip otyrmyz. Bizge zaýyt boıynsha shaǵyn ekskýrsııa uıymdastyryldy, zaýyt óte qýatty eken, — dep áserimen bólisti «Qazhrom» TUK» AQ Dóń taý-ken baıytý kombınatynyń dıspetcheri Anar Mahanalına.
«Kazakhmys Smelting» JShS hımııalyq taldaý zerthanashysy Aızada Qýanyshbaeva saıysqa qatysý barysynda kóp jańa daǵdylar men bilim alǵanyn aıtty.
— Biz úshin bul árıne, orasan zor tájirıbe boldy. Saıysqa qatysý barysynda kóp jańa daǵdylar men bilim aldyq, tájirıbe almastyq. Barlyq qatysýshymen jáne sarapshylarmen tanysqanyma qýanyshtymyn. ERG uıymdastyrýshylaryna alǵysymdy bildirgim keledi, — dedi Aızada Qýanyshbaeva
Al ERG Service kompanııasynyń sandyq baǵdarlamalyq basqarýy bar tokarlyq stanok tokary Dmıtrıı Gýsev jańa býyndaǵy zamanaýı sandyq baǵdarlamalyq basqarýy bar tokarlyq stanokta jumys isteý óte qyzyqty bolǵanyn alǵa tartty.
— Baıqaý tapsyrmasy joǵary dáldikti jáne óńdeý tehnologııasyn tereń túsinýdi talap etti. Ásirese jańa býyndaǵy zamanaýı sandyq baǵdarlamalyq basqarýy bar tokarlyq stanokta jumys isteý óte qyzyqty boldy. Ýaqyt shekteýli jaǵdaıda ony «jol-jónekeı» meńgerý naǵyz synaqqa aınaldy. Alaıda dál osyndaı mindetter kásibı turǵyda damýǵa jáne óz kúshińe senimdi bolýǵa kómektesedi. ERG Skills International baıqaýyndaǵy jeńis — bul tek jeke eńbektiń emes, sonymen qatar áriptester men kompanııanyń turaqty qoldaýynyń nátıjesi, — dep atap ótti Dmıtrıı Gýsev.
Bul baıqaý ónerkásiptik kásiporyndar men bilim berý uıymdarynyń yntymaqtastyǵyn nyǵaıtýdyń mańyzdy qadamyna aınalyp, kásibı quzyretterdi damytý men jumysshy mamandyqtarynyń tanymaldyǵyn arttyrýǵa yqpal etkenin atap ótken jón.
Aıtpaqshy, ERG Skills baıqaýy 2023 jyldan beri jyl saıyn ótkizilip keledi. Sondaı-aq ERG joǵary oqý oryndarymen birlesip, TKMK 2.0 jańa mamandyqtar atlasyn ózektendirý jáne atlastaǵy mamandyqtarǵa arnalǵan bilim berý baǵdarlamalaryn ázirleý jumystaryn júrgizip keledi. Top Qazaqstanda álemdik deńgeıdegi korporatıvtik ýnıversıtettiń tolyqqandy júıesin qurǵan alǵashqy kompanııaǵa aınalyp otyr.