ERG Rýdnyıda temir zaýytyn salý týraly strategııalyq kelisimshart jasasty
ASTANA.KAZINFORM - Eurasian Resources Group kompanııasy Primetals Technologies Austria GmbH jáne Midrex Technologies Inc konsortsıýmymen Rýdnyı qalasynda ystyq brıkettelgen temir óndiretin zaýyt salý týraly strategııalyq kelisimshartqa qol qoıdy, dep habarlaıdy Kazinorm agenttiginiń tilshisi.
Jańa zaýyttyń jyldyq óndiristik qýaty 2 mıllıon tonnaǵa jetedi.
Kelisimshart ınjenerııa, negizgi tehnologııalyq jabdyqtar jetkizý jáne zaýyt qurylysy boıynsha birqatar qyzmetterdi qamtıdy.
Kelisimge saltanatty túrde qol qoıý Rýdnyı qalasynda ótti.
Jańa zaman zaýyty
Bolashaq zaýyt Ortalyq Azııadaǵy eń iri jasyl metallýrgııa nysandarynyń birine aınalatyny aıtyldy. Metaldanýy 93%-dan kem emes jáne quramyndaǵy temiri 90%-dan joǵary shoıyn óndirý Qazaqstannyń álemdik bolat naryǵyna básekege qabiletti ónimdermen shyǵýyna múmkindik beredi.
- Memleket basshysy óz Joldaýynda ishki naryqta da, halyqaralyq naryqta da básekege qabiletti joǵary óńdelgen ónim shyǵarý basymdyq bolatynyn birneshe ret aıtty. Al konsortsıýmmen kelisimshartqa otyrý - ERG-niń Qazaqstannyń metallýrgııa salasyn damytýdaǵy kóshbasshylyǵyn bildiretin strategııalyq qadam bolady. Biz joǵary tehnologııalyq óndiris qurýǵa talpynyp jatyrmyz, ol Qazaqstandaǵy jasyl metallýrgııa ónerkásibin damytýdyń jańa perspektıvalaryn ashyp, jumys oryndaryn qurý jáne bilikti adamı kapıtaldy damytýǵa járdemdesedi, - dep atap ótti ERG bas atqarýshy dırektory jáne dırektorlar keńesiniń tóraǵasy Shýhrat Ibragımov.
Qostanaı oblysynyń ákimi Qumar Aqsaqalov ystyq brıkettelgen shoıyn zaýytynyń qurylysy 17 respýblıkalyq bastamaǵa engen oblys pen respýblıka úshin basty joba bolatynyn atap ótti.
- Jobalyq-smetalyq qujattamalar qazirdiń ózinde daıyn, qurylystyń tezirek bastalýy úshin qoldan kelgenniń bárin jasaımyz. Bul joba bizdiń azamattar úshin kóptegen jumys oryndaryn ashady, salyq túsimderin túsiredi jáne óńir ekonomıkasyn aıtarlyqtaı nyǵaıtady, - dedi oblys ákimi.
Jobany toptyń enshiles kásiporny «QazIron ERG» JShS júzege asyrady. Zaýyttyń óndiristik qýattylyǵy jylyna 2 mıllıon tonna ystyq brıkettelgen temirdi qurasa, ınvestıtsııa kólemi 650 mıllıard teńgeden asady dep josparlanǵan. Іske qosý 2029 jylǵa josparlanyp, 1000-nan astam jumys orny ashylady. Jumys kúshin damytý qazirdiń ózinde bastalyp ketti.
- Biz jobaǵa 650 mıllıard teńge (1,2 mıllıard dollardan astam) ınvestıtsııa salyp jatyrmyz. Bul kompanııanyń ónim jelisin keńeıtip, resýrstyq bazasyn nyǵaıtyp, óndiristiń kelesi deńgeıine — taý-ken óndirýden joǵary qosylǵan quny bar ónimge kóshýge múmkindik beredi. Biz Rýdnyı ındýstrıaldy ýnıversıtetimen belsendi jumys istep, bolashaq óndiris úshin kadrlar daıyndap jatyrmyz, sondaı-aq qazirdiń ózinde Rýdnyı ındýstrııalyq ýnıversıtetimen baılanys ornatyldy, - dedi ERG bas dırektory, dırektorlar keńesiniń tóraǵasy Shýhrat Ibragımov.
Ekologııalyq tehnologııalar
Óndiris koks ornyna tabıǵı gaz paıdalanatyn MIDREX Flex temir tehnologııasyna negizdeletin bolady, bul dástúrli tehnologııamen salystyrǵanda kómirtegi izin 50%-dan astam azaıtady.
Kásiporyn óz óndirisindegi («SSGPO» AQ) totyǵýǵa ushyraǵan temir keni túıirshikterin qaıta óńdeıdi jáne alynǵan ystyq ónimdi bolashaq bolat balqytý tsehyna tikeleı jetkizý múmkindigine ıe bolady.
Joba seriktesteri metallýrgııalyq tehnologııanyń álemdik kóshbasshylary.
Midrex Technologies Inc. ystyq brıkettelgen temir óndirisiniń álemdik naryǵynyń shamamen 90% quraıdy jáne 50 jyl ishinde 21 elde 100-ge jýyq zaýyt saldy.
Primetals Technologies Austria GmbH – qara jáne tústi metallýrgııa ónerkásibine arnalǵan jabdyqtar men ınjenerlik sheshimderdiń jetekshi óndirýshisi.
- Bul aýqymdy joba Qazaqstannyń metallýrgııa ónerkásibinde jańa dáýir bastap, ERG-diń álemdik naryqtaǵy ornyn nyǵaıtady. Oǵan qatysý – biz úshin úlken mártebe. MIDREX Flex - óz segmentinde álemdegi eń ekologııalyq taza sheshim bolyp sanalady, - dep atap ótti Primetals Technologies atqarýshy vıtse-prezıdenti Andreas Fıbek.
Aýstrııanyń Qazaqstan Respýblıkasyndaǵy Elshisi Andrea Baher sátti bastama men bolashaqqa arnalǵan aýqymdy josparlar týraly aıtty.
-Primetals Technologies kompanııasy - álem boıynsha jumys isteıtin aýstrııalyq jetekshi kompanııalardyń biri. Birlesken jobamyz aımaqtyń damýyna aıtarlyqtaı serpin berip, Aýstrııa men Qazaqstan arasyndaǵy ekonomıkalyq qarym-qatynasty nyǵaıtady. Meniń Aýstrııa elshisi retindegi maqsatym – Qazaqstan aımaqtarynda aýstrııalyq kompanııalarǵa jol ashý, al bul úshin Qostanaı oblysynyń áleýeti zor, - dedi ol.
Joba Qostanaı oblysy men elimizdiń ındýstrııalyq damýyna mańyzdy úles bolmaq. Ystyq brıkettelgen temir zaýyty ekonomıkany ártaraptandyrýǵa kómektesedi.