ERG Pavlodar oblysyndaǵy áleýmettik mańyzdy jobalarǵa 3 mlrd teńge bóldi
PAVLODAR. QazAqparat - Eýrazııalyq top pen Pavlodar oblysynyń ákimdigi 2019 jyly memorandým aıasynda 3 mlrd teńgelik áleýmettik mańyzdy jobalardy júzege asyrmaq, dep habarlaıdy pavlodarnews.kz.
Oblystyq ákimdikte Eýrazııalyq top bas atqarýshy dırektorynyń birinshi orynbasary Aldııar Qaztaev pen oblys ákimi Bolat Baqaýov 2019 jyly áleýmettik mańyzdy jobalardy júzege asyrýdaǵy ózara áriptestik týraly memorandýmǵa qol qoıdy.
«Eýrazııalyq top álemdegi iri ártaraptandyrylǵan kompanııalardyń biri bolyp tabylady. Topqa kiretin oblysymyzdaǵy kásiporyndar óńirimizdiń óndiristik qabiletin arttyrýǵa zor úlesin qosýda. Top oblysymyzdaǵy 22500 adamdy jumyspen qamtyp otyr. Elbasynyń tapsyrmasymen qyzmetkerlerdiń jalaqysyn kótergen alǵashqy kompanııalardyń biri. Kóptegen jyldar boıy óńirimizde áleýmettik salany jaýaptanyp keledi», - dedi oblys ákimi Bolat Baqaýov.
Eýrazııalyq toptyń Pavlodar óńirine áleýmettik ınvestıtsııasynyń kólemi 7 jylda 17 mıllıard teńgege ósti. Olar kóptegen mańyzdy máselelerdi sheshýge septigin tıgizýde. Eýrazııalyq toptyń qoldaýymen Pavlodar oblysynda ótken jyly 50 metrlik basseın boı kóterdi. Elordamyzdyń 20 jyldyǵyna oraı Nur-Sultan qalasynda velojol salyndy. Myrzashoqy taýyndaǵy arqan jol da halyq demalatyn tamasha orynǵa aınaldy. Qazirgi ýaqytta Pavlodar mýzeıiniń kórme zaly, muz arenasynyń qurylysy jalǵasyn tabýda. Fýtbolshylar men voleıbolshylar dástúrli túrde demeýshilik alýda. 2019 jylǵy memorandým aıasynda bólingen qarajat qurylys pen áleýmettik mańyzdy nysandardyń jóndeýine jumsalady. Sondaı-aq, oblys kólemindegi joldardyń jóndelýi, Aqsý qalasyndaǵy ortalyq jaǵalaýdy qaıta qalpyna keltirý, kóshelerge jaryq shamdaryn ornatý jumystary qarjylanady. Jańadan aýlalardaǵy sport alańdary men fýtbol manejin salý da josparda bar.
Eýrazııalyq top dırektorlary keńesiniń tóraǵasy Aleksandr Mashkevıch osymen 14 jyl boıy ERG oblys ákimdigimen áleýmettik mańyzdy jobalardy júzege asyrý úshin memorandým jasasyp kele jatqanyn atap ótti. «25 jyl osy óńirdiń jumysyna aralasyp kelemin. Óńir halqynyń aldynda jaýapkershilikti sezinemin. Biz áli de adamdardyń ómirin jaqsartýǵa, áleýmettik baǵytty damytýǵa, jastardyń sapaly bilim alýyna úles qosýdy jalǵastyratyn bolamyz»,- dedi Aleksandr Mashkevıch.
