ERG Ortalyq Azııadaǵy alǵashqy avtodısk zaýytyn ashpaq
ASTANA. KAZINFORM — ERG men Astana Motors tehnıkalyq seriktesi – Hyundai SungWoo kompanııasy birlesip, Pavlodarda Ortalyq Azııadaǵy alǵashqy tolyq tsıkldi avtokólik dıskilerin óndiretin kásiporyn ashady.
Seýlde Eurasian Resources Group pen Ońtústik Koreıanyń Hyundai SungWoo Casting kompanııasy Pavlodarda jeńil qorytpadan jasalatan avtomobıl dıskilerin óndiretin zaýyt salý jobasyna qatysty yntymaqtastyq týraly memorandýmǵa qol qoıdy. Jobanyń seriktesi – qazaqstandyq avtoóndirýshi Astana Motors. Jobaǵa quıylatyn jalpy ınvestıtsııa kólemi – $50 mln. Serııalyq óndiristi 2028 jyly iske qosý josparlanyp otyr.Qazaqstan men Ońtústik Koreıanyń birlesken ınvestıtsııalyq jobasy Qazaqstan Respýblıkasynyń Prezıdenti Qasym-Jomart Toqaevqa tanystyryldy.
Jańa zaýyt – Orta Azııadaǵy avtomobıl dıskilerin tolyq tsıkldi óndiretin alǵashqy kásiporyn bolady. Óndiristik tizbek 5 kezeńdi qamtıdy: boksıt pen (bastapqy alıýmınıı totyǵy) glınozem óndirýden bastap, bastapqy alıýmınıı alýǵa, alıýmınıı qorytpasyn daıyndaýǵa jáne daıyn avtomobıl dıskilerin óndirýge deıingi kezeńder. Osylaısha, ERG-diń qazaqstandyq alıýmınııi elimizdiń ishinde óńdelip, avtomobıl ónerkásibindaǵy qosylǵan quny joǵary daıyn komponentke aınalady.
Joba aıasynda aýdany 16 myń sharshy metr kásiporyn salynbaq. Birinshi kezeńde odaǵy óndiristik qýat – jylyna 500 myń avtomobıl dıskisi mejesinde bolady. Zaýytta shamamen 200 joǵary bilikti jumys orny ashylady. Jobanyń ekinshi kezeńinde óndiris kólemin jylyna 1 mln dıskige deıin ulǵaıtý josparlanyp otyr.
– Biz bul jobany – Qazaqstannyń alıýmınıı óndirisi salasyn damytýdaǵy kelesi qadam dep bilemiz. Memleket basshysynyń tapsyrmasyna sáıkes, biz óndiriste tolyq qaıta óńdeý strategııasyn ustanyp kelemiz. Óndiristiń barlyq 5 kezeńi Qazaqstanda júzege asyrylady – boksıt óndirýden bastap, daıyn alıýmınıı dıskilerin shyǵarýǵa deıin. Bul qosylǵan qundy arttyrýǵa, jańa quzyretter qalyptastyrýǵa jáne elimizdegi ónerkásip kooperatsııasyn odan ári damytýǵan jańa múmkindikter ashady, – dedi ERG-diń Qazaqstandaǵy bas dırektory Kýdrát Shamıev.
Jobanyń tehnologııalyq seriktesi – avtomobıl ónerkásibindegi jeńil qorytpaly dısk óndirýge mamandanǵan Hyundai SungWoo Casting kompanııasy. Seriktes jobany tehnologııalyq sheshimdermen jáne óndiristik protsesterdi uıymdastyrý, óndiristi jolǵa qoıyp, sapany baqylaý salalaryndaǵy saraptamalyq tájirıbemen qamtamasyz etedi.
Kásiporynnyń ónimderi halyqaralyq avtomobıl ónerkásibiniń talaptaryna sáıkes bolady. Ónimderdi Qazaqstan naryǵyna, sondaı-aq Ortalyq Azııa elderine eksportqa baǵyttaý kózdelgen.
Jobany iske asyrý qazaqstandyq alıýmınııdi qaıta óńdeý deńgeıin arttyrýǵa, avtomobıl ónerkásibinde jańa óndiristik quzyret qalyptastyrýǵa jáne jergilikti jetkizýshiler tizbegin odan ári damytýǵa negiz bolady.
Qazaqstandyq alıýmınııden óndirilgen alǵashqy serııalyq alıýmınıı dıskisin 2028 jyly shyǵarý josparlanyp otyr.
ERG-diń tynys-tirshiligi jaıly tolymdy aqparat resmı telegram-arnamyzda
