ERG-degi memlekettiń 40 paıyzdyq úlesi «Samuryq-Qazynaǵa» ótti
ASTANA. KAZINFORM — Memleketke tıesili Eurasian Resources Group (ERG) kompanııasynyń 40 paıyz aktsııasy «Samuryq-Qazyna» ulttyq ál-aýqat qoryna berildi. Bul aqparatty qordyń baspasóz qyzmeti Kazinform tilshisine rastady.
Qordyń málimetinshe, tıisti sheshimdi Qazaqstan Úkimeti 4 tamyzda qabyldaǵan.
— 2026 jylǵy 4 tamyzda Qazaqstan Respýblıkasy Úkimetiniń sheshimine sáıkes ERG-degi memleketke tıesili 40 paıyz aktsııa «Samuryq-Qazyna» AQ-nyń menshigine ótti. Bul aktıvti berý «Samuryq-Qazyna» AQ-nyń memleket múddesi úshin aktıvterdi tıimdi basqarýǵa baǵyttalǵan strategııasy men egemen qor retindegi róline sáıkes keledi, — dep habarlady qordyń baspasóz qyzmeti.
ERG-niń resmı saıtyndaǵy aqparatqa sáıkes, menshik qurylymy ózgergennen keıin Qazaqstan Úkimeti jalǵyz aktsıoneri bolyp esepteletin «Samuryq-Qazyna» kompanııanyń 40 paıyz aktsııasyna ıe. Taǵy 39,3 paıyz aktsııa Shahmurat Mútálipke, al 20,7 paıyz aktsııa ERG negizin qalaýshylardyń biri Álıdjan Ibragımovtiń muragerlerine tıesili.
Buǵan deıin mamyr aıynda Shahmurat Mútálipke tıesili Nature Energy Solutions Ltd. kompanııasy ERG-diń 39,3 paıyz aktsııasyn Patoh Shodıevtiń 18,6 paıyz jáne Aleksandr Mashkevıchtiń muragerlerine tıesili 20,7 paıyz aktsııalaryn satyp alý arqyly ıelengen.
Sondaı-aq shilde aıynda Qazaqstannyń Ónerkásip jáne qurylys mınıstrligi ERG bıznesin qazaqstandyq jáne halyqaralyq kompanııalarǵa bólýi múmkin degen aqparatty joqqa shyǵarǵan. Vedomstvo kompanııadan bıznesti bólý týraly eshqandaı ótinish túspegenin málimdedi.
