Erejesiz jekpe-jekten qazaq sportshylary AQSh quramasymen kúsh synasty
ALMATY. Qazannyń 14-i. QazAqparat /Erbol Turymbetov/ - Qazan aıynyń 10-y kúni AQSh-tyń Nevada shtatynda ótken erejesiz jekpe-jekte Ardaq Nazarov bastaǵan qazaq sportshylary AQSh quramasynan 2:3 esebimen jeńilis tapty. Bul týraly «Alaman» ulttyq elektrondyq basylymy habarlady.
Elimizdiń atynan bul synǵa Ardaq pen Beıbit Nazarovtar, Qazbek Áshimov, Begnar Amanbaev, Narıman Musaevtar qatysqan edi. Ókinishke qaraı, Ardaq Nazarov jeńilis tapty. Amerıka Qurama Shtatynda óziniń ekinshi jekpe-jegin ótkizgen Ardaq jergilikti sportshy Lens Vıpfke jol berdi. Tóreshiler bir aýyzdan amerıkalyqtyń jeńisin moıyndady. Kezdesý nátıjeleri: 50-45, 50-45, 50-45. Kerisinshe, aǵasynyń esesin Beıbit qaıtardy. Qarsylasy Hose Salgadoǵa 1-shi raýndta-aq qylǵyndyrý ádisin qoldanǵan Beıbit esh qınalmastan jeńisti oljalady. Begnar Amanbaev ta qazaq eliniń mereıin ústem etti. Ol qarsylasy Morıs Sentersti nebári 2 mınýttyń ishinde eseńgiretip tastady.
Osy ýaqytqa deıin 12 kezdesý ótkizip, eshkimge jeńilmeı kelgen Qazbek Áshimov 3 raýndqa sozylǵan teke-tireste Keısı Djonsonnan aýyr soqqy alyp, kezdesýdi jalǵastyra almady. Al Narıman Musaev bolsa, Brendon Hemplemanǵa upaı sanymen utyldy. Esep: 29-28, 28-29, 29-28.
