Ereje buzǵandar, joǵary ball, tańdalǵan pánder: UBT-nyń alǵashqy qorytyndylary jarııalandy
ASTANA. KAZINFORM — El aýmaǵynda negizgi ulttyq biryńǵaı testileý 16 mamyrda bastaldy, búginde 52 myńnan astam talapker baǵyn synady. Ǵylym jáne joǵary bilim mınıstrligi testileýdiń alǵashqy aptasynyń nátıjesin jarııalady.
Bıyl talapkerlerdiń 66%-y testileýdi qazaq tilinde, 33%-y orys tilinde jáne 65 talapker aǵylshyn tilinde tapsyrdy. Birinshi aptanyń qorytyndysy boıynsha talapkerlerdiń 62%-y shekti ball jınady. Bes pán boıynsha ortasha ball 61-di qurady. Eń joǵary nátıje — 140 ball — Túrkistan oblysynan Ábilhan Jánibek kórsetti.
UBT-ǵa qatysýǵa 216 myń talapkerden 399 myńǵa jýyq ótinish kelip tústi. Qazir testke qatysýshylardyń basym bóligi, atap aıtqanda, 20%-y «Matematıka-Fızıka», 17%-y «Shyǵarmashylyq emtıhan» pánder kombınatsııasyn tapsyrdy. 11%-y «Bıologııa-Hımııa» kombınatsııasyn tańdaǵan. Erekshe bilim berý qajettilikteri bar 163 talapkerge tıisti talapqa saı jaǵdaı jasaldy.
— Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınette jarııalanady. UBT-ny ótkizýdiń birinshi aptasynda 55 ereje buzýshylyq anyqtaldy. 26 talapker smartfondardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 29 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq, — deıdi mınıstrlikten.
2025 jylǵy UBT aıaqtalǵannan keıin 31 qazanǵa deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Eske salaıyq, búginde elimizde negizgi Ulttyq biryńǵaı testileý júrip jatyr, ol 7 shildege deıin jalǵasady.
Aıta ketsek, bıyl elimizde 217 myń túlek mektep bitirdi.