Ereje buzatyn sheteldik nómiri bar kóliktermen «aqyldy» kameralar kúrespek
PETROPAVL. QazAqparat – Petropavlda ıntellektýaldyq beınebaqylaý júıesi budan bylaı jol erejesin buzǵan sheteldik nómiri bar avtokólikterdi de tirkeıdi, dep habarlaıdy «QazAqparat» tilshisi.
Soltústik Qazaqstan oblystyq Polıtsııa departamenti baspasóz qyzmetiniń málimetinshe, endi sheteldik nómir taqqan avtokólikter jol erejesin buzǵan jaǵdaıda jaýapkershilikten qutylmaıdy. Vıdeobaqylaý júıesi joldaǵy tártipsizdikti buǵan deıin de tirkep kelgen. Alaıda, bul shetelde tirkelgen kólik júrgizýshilerine aıyppul salýǵa múmkindik bermeıtin. Saldarynan osyndaı kólik tizgindegender erkinsip, beınebaqylaý júıesin elemeı, zańdy belden basatyn bolǵan.
Endi SQO polıtseıleri «Resolution Generator» baǵdarlamalyq keshenin iske qosty. Ol túrli memlekettik organdardyń bazasyn Ákimshilik quqyq buzýshylyqtyń biryńǵaı tizilimi aqparattyq júıesimen biriktirip, kólik týraly aqparat alýǵa múmkindik berdi. Sheteldik nómirler endi avtomatty túrde saqtandyrý polısi arqyly tekseriledi.
«Sheteldik kóligi bar júrgizýshiler muny eskerýleri qajeti. Endi jol erejesin buzǵany jónindegi habarlama kólikti saqtandyrýshynyń atyna keledi», - dedi SQO PD ákimshilik polıtsııa basqarmasynyń bastyǵy Jasulan Ospanov.
Petropavl qalasynda ıntellektýaldyq beınebaqylaý júıesi J.Jabaev pen Músirepov, Jumabaev pen Sútishev, N.Nazarbaev pen Abaı, Internatsıonal jáne Astana kósheleriniń qıylysynda tur. Olar jyldamdyqty asyrý, baǵdarshamnyń ruqsat etilmegen belgisine jáne toqtaý syzyǵynan ótip ketý sekildi ereje buzýshylyqtardy tirkeıdi. Jyl basynan beınebaqylaý 2 myńnan astam quqyq buzýshylyqty tirkep, olar boıynsha 5,9 mln teńgege aıyppul salyndy.
