Ereje aýysqanymen baıaǵy boks qoı - Á.Nııazymbetov
ASTANA. QazAqparat - Olımpıadanyń kúmis júldegeri Ádilbek Nııazymbetov Halyqaralyq áýesqoı boks qaýymdastyǵynyń (AIBA) upaıdy sanaý erejesin ózgertkenin áli estimese de, atalǵan bastamany qoldap otyr, dep xabarlaıdy QazAqparat tilshisi.
"Endi, ondaı ózgeristerdiń bolǵany durys dep oılaımyn. Nege deseńiz, buǵan deıin basqasyn da kórdik, tórt raýndty eki mınýttan da kórdik. Sosyn úsh raýnd úsh mınýttan da boldy. AIBA ártúrli erejelerdi engizip kórip jatyr. Joǵary jaqtaǵylarǵa qaısy yńǵaıly, qaısy jaqsy, ózderi qalaı aıtady, solaı bolady. Bizdiki tek rıngke shyǵyp bokstasý, qarsylasty utý ǵana boldy", - dedi Á.Nııazymbetov QazAqparat tilshisine bergen suxbatynda.
Onyń oıynsha, árbir raýndtyń qorytyndysyn jekpe-jektiń sońynda ǵana kórsetýge qatysty burmalaýshylyqtar bolmaýy tıis. "Ár raýndtyń nátıjesi bapkerlerge syrttan jaqsy kórinedi ǵoı. Olar sony aıtyp otyrady. Sosyn óziń de utyp jatqanyńdy sezesiń. Soqqy jibermeı, upaıdy jınaı berseń, boldy. Qandaı ereje bolsa da, baıaǵy boks qoı. Ózińe soqqy darytpaı, qarsylasty kóbirek urýyń qajet", - dep atap kórsetti Á.Nııazymbetov.
Aıta keteıik, jaqynda Halyqaralyq áýesqoı boks qaýymdastyǵy (AIBA) aǵymdaǵy jyly ótetin barlyq jarystarda boksshylardyń upaılaryn jańa ereje boıynsha esepteıtinin málimdedi. Endi upaı sanyna jaýap beretin sýdıalar komıssııasynyń jumysyn jalǵyz komıssııa tóraǵasy ǵana atqaratyn bolady. Ol upaıdy sanaıtyn elektrondy baǵdarlamany tekserip otyrady. Rıngtiń janyndaǵy sýdıalar bolsa, sharshy alańnyń tórt buryshynda otyrady. Al árbir raýndtyń qorytyndysy jekpe-jektiń sońynda ǵana jarııalanady.
