Ereımentaýdaǵy et óńdeıtin keshenniń ónimderine suranys joǵary - Aqmola oblysy
KÓKShETAÝ. QazAqparat - Aqmola oblysy Ereımentaý aýdanynda ótken jyly iske qosylǵan et óńdeıtin jańa keshenniń ónimderine Astana qalasynda suranys joǵary. Bul týraly aımaq basshysy Məlik Myrzalınniń aýdanǵa sapary barysynda aıtyldy, dep habarlaıdy QazAqparat tilshisi.
Aýdanǵa sapary barysynda oblys ákimi osyndaǵy irgeli sharýashylyqtardyń biri bolyp sanalatyn «Jańa Bereke» sharýa qojalyǵynda bolyp, ondaǵy mal sharýashylyǵyn damytý barysymen tanysty. Sharýashylyqtyń atqarýshy dırektory Jandos Hasenovtiń aıtýynsha, búgingi kúni sharýashylyqta 2 myńnan astam bas iri qara bar.
Sonymen qatar, sharýa qojalyǵy ártaraptandyrý sheńberinde mal azyǵy bolatyn dándi daqyldar egiletin alqaptardy keńeıtýde. Egistikke jaramdy jerdiń 4 myń gektaryna bir jyldyq jáne kóp jyldyq shóp egiledi. Ótken jyly qojalyq et óńdeıtin jańa keshendi iske qosty.
Astana qalasynyń aınalasynda azyq-túlik beldeýin damytý sheńberinde iske qosylǵan bul jobanyń quny 1 mıllıard 131 mıllıon teńge. Bul qarjynyń 738 mıllıon teńgesi «QazAgroQarjy» aktsıonerlik qoǵamy arqyly berilse, qalǵanyn sharýa qojalyǵy óz qaltasynan saldy. Oǵan qosa, asyl tuqymdy mal ósiretin sharýashylyq mártebesi bar sharýa qojalyqtyń 3 myń basqa arnalǵan mal bordaqylaý alańy da bar.
«Asyl tuqymdy mal basyn kóbeıtý úshin 2013 jyly «QazAgroQarjy» aktsıonerlik qoǵamynyń qarjysyna 800 bas qazaqtyń aqbas sıyry men 98 bas qalmaq sıyrlaryn satyp aldyq. Aldaǵy ýaqytta mal basyn 3 myńǵa jetkizip, et óndirisin arttyrý josparda bar», - dedi Jandos Hasenov.
Keshen iske qosylǵannan beri barlyǵy 70 tonnaǵa jýyq et satylyp, odan 81 mıllıon teńgeden astam tabys túsken. Ekologııalyq jaǵynan taza, sapaly mal eti negizinen Astana qalasynyń saýda oryndaryna ótkizilýde. Elordalyqtar tarapynan iri qara etine suranys joǵary. Sonymen qatar, seriktestik halyqtyń ál-aýqatyn kóterýge de ıgi yqpalyn tıgizýde. Osy maqsatta Novomarkovka jáne Kishi Torǵaı aýyldarynda jumysshylarǵa arnalǵan barlyǵy bes turǵyn úı salyp bergen.
