Ereımentaýdaǵy dala órti eki táýlikte sóndirildi
EREIMENTAÝ. QazAqparat - Aqmola oblysynyń Ereımentaý aýdanyndaǵy dala órti sóndirildi, dep habarlaıdy QazAqparat tilshisi aımaqtyq TJD baspasóz qyzmetine silteme jasap.
«Ereımentaý aýdanynda órt sóndirýshiler eki táýlik boıy arpalysyp júrip, dala órtin sóndirdi. Tilsiz jaý tamyzdyń 11-de saǵat 09:30 aýyzdyqtalyp, saǵat 15:50 sóndirildi.
9 tamyzda Qoıtas aýyldyq okrýginiń aýmaǵyndaǵy Qaratal jáne Masaqpaı jaılaýynda da órt shyqqan bolatyn. Jalyn 300 gektar aýmaqty sharpydy. Zardap shekkender joq», - deıdi vedomstvodan.
Vedomstvonyń málimetishe, Tilsiz jaýdy aýyzdyqtaýǵa TJD jeke quramynan 52 adam men 12 arnaıy tehnıka, «Ereımentaý» orman sharýashylyǵynyń 14 jumysshysy men 3 tehnıkasy, jergilikti atqarýshy organdardyń 112 qyzmetkeri men 18 tehnıkasy, «KazHorseMugalzhar» JShS-nyń 6 jumysshysy men 2 tehnıkasy, «Qyrmanbaı» ShQ 2 tehnıkasy jumyldyryldy.
«Aqmola oblystyq TJD-da Ereımentaý aýdanyndaǵy dala órtin sóndirý boıynsha jedel shtab quryldy. Osyǵan qatysty kez kelgen málimet boıynsha 8716-2-55-14-80 habarlasýǵa bolady. Jaǵdaıdy óńirdiń TJD basshysy óz baqylaýyna aldy», dep tolyqtyrdy vedomstvodan.
