Ereımentaýda jyl sońyna deıin 45 páterli eki úı paıdalanýǵa beriledi-Aqmola oblysy
KÓKShETAÝ. QazAqparat - Aqmola oblysynyń Ereımentaý aýdanynda jyl sońyna deıin 45 páterli eki úı paıdalanýǵa beriledi. Bul týraly brıfıngte aýdan ákimi Abaı Áljanov málim etti, dep habarlaıdy QazAqparat tilshisi.
«Qazaqstanda halyqty turǵyn úımen qamtamasyz etý bizdiń memleketimizdiń basty basymdyqtarynyń biri. Turǵyn úıdi barynsha qoljetimdi etý úshin Ereımentaý aýdanynda «Nurly jer» baǵdarlamasy boıynsha 45 páterli eki turǵyn úıdiń qurylysy júrgizilýde. Aǵymdaǵy jyly 1-pozıtsııa boıynsha 45 páterli jalǵa beriletin kommýnaldyq turǵyn úıdiń qurylysyn aıaqtaý úshin 30,9 mıllıon teńge, 2-pozıtsııa boıynsha ekinshi 45 páterli turǵyn úıge 35,7 mıllıon teńge qarjy bólindi. Búgingi tańda eki nysan boıynsha ishki árleý, sanfaıans ornatý jumystary júrgizilýde. Nysandardy paıdalaný berý merzimi 2021 jyldyń qarasha aıynyń sońyna josparlanǵan», - dedi aýdan ákimi.
Sonymen birge, aýdan ákimi jyl sońyna deıin eki basseıni, jattyǵý zaly jáne oıyn bólmeleri bar sporttyq-saýyqtyrý keshenin ashý josparlanǵanyn atap ótti.
«2022 jyly «Aýyl-El besigi» baǵdarlamasy sheńberinde Oljabaı batyr aýylynda jáne Taıbaı aýyldyq okrýginiń Taıbaı jáne Eltaı aýyldarynda kóshe jaryǵyn salýǵa jobalaý-smetalyq qujattama ázirleý boıynsha jumystar júrgizilýde. 2021-2022 jyldary jylytý maýsymyna jylýmen úzdiksiz qamtamasyz etý úshin №2 KVTS-10 qazandyǵyna jóndeý júrgizildi. Búgingi tańda joba boıynsha barlyq jumystar aıaqtaldy. Qala 100 paıyz jylýmen qamtamasyz etilgen. Ereımentaý qalasynda (Abylaıhan kóshesi, uzyndyǵy 6 km) jóndeý jumystary aıaqtalýda, bul maqsatqa oblystyq bıýdjetten 57,5 mıllıon teńge bólindi», - dep túıindedi aýdan ákimi.
