Ereımentaýda jetim balalarǵa páter kiltteri tabystaldy
ASTANA. QazAqparat - Aqmola oblysy Ereımentaý aýdandyq ákimdiginde jetim balalarǵa saltanatty túrde páter kiltteri tabystaldy, dep habarlaıdy Aqmola oblystyq ishki saıasat basqarmasy.
Ereımentaý aýdandyq ákimdigi ata-ana qamqorlyǵynan aıyrylǵan balalarǵa Ereımentaý qalasynan 2 úsh bólmeli, 2 eki bólmeli jáne 2 bir bólmeli páter men Novomarınovka aýylynan bir úı syılady.
Kezekte turǵandardyń tizimine sáıkes, Salavat Zarıpov, Saıat Arılın, Asqar Smatov, Arman Jumashev, Arnold Borgard jáne Safronovtar áýleti páterli boldy. Ereımentaý aýdanynyń ákimi Ermek Nuǵmanovtyń bastamasymen páter ıelerine kiltti saltanatty túrde eńbek ardagerleri tabys etti.
Jańa páter ıeleriniń atynan Arman Jumashev ystyq lebizin bildirip, taǵdyrdyń tálkegimen ata-ana qamqorlyǵynsyz qalǵan balalarǵa kóńil bólip, qamqorlyq tanytqany úshin alǵys aıtty. Ereımentaý aýdanynyń ákimi qonystoı ıelerin quttyqtaı otyryp, aýdannyń bolashaǵy men aldaǵy kezeńdegi mindetterge toqtalyp ótti. Sonymen qatar, aýdandyq Uly Otan soǵysy jáne tyl ardagerleri keńesiniń tóraǵasy Tólegen Ábdın jańa páter ıelerin quttyqtady.
