Ereımentaý turǵyny jasyryn marıhýana ósiretin zerthana ustaǵany úshin 3 jylǵa sottaldy

ASTANA. KAZINFORM — 2024 jyldyń qarasha aıynda Ereımentaý aýdany prokýratýrasynyń nusqaýy boıynsha polıtsııamen aýlany aralaý barysynda marıhýana ósirý boıynsha jasyryn fıto-zerthanasy anyqtalǵan bolatyn. Bul týraly Aqmola oblysy prokýratýrasy málim etti.

Atap aıtqanda, aýdannyń 36 jastaǵy turǵyny jaldamaly úıde marıhýana ósirýmen aınalasatyny anyqtaldy.

— Úıdi tintý kezinde qarasora butalary bar 59 qumyra, marıhýana tuqymdary, elektrondy tarazylar, ýltrakúlgin shamdar, termometrler, jylytqyshtar, salqyndatqyshtar jáne basqa jabdyqtar tabyldy. Saraptama qorytyndysyna sáıkestintý barysynda alynǵan ósimdikterde esirtki zattary anyqtalǵan, — dep habarlady prokýratýradan. 

Sotqa deıingi tergep-tekserý barysynda kináli tulǵa moıyndaý aıǵaqtaryn berip, prokýrormen is sotqa jiberilgen.

Aýdan sotynyń úkimimen ol qylmys jasaǵany úshin kináli dep tanylyp, 3 jylǵa bas bostandyǵynan aıyryldy.