Ereımentaý turǵyndary apat saldarynan sýsyz qaldy

ASTANA. KAZINFORM — 2026 jyldyń aqpan aıynda Ereımentaý qalasy sý qubyry júıesinde apattyq jaǵdaı týyndap, onyń saldary áli kúnge deıin qala turǵyndaryn alańdatyp otyr, dep habarlaıdy Kazinform tilshisi.

Aqmola oblysy Ereımentaý qalasynyń turǵyndary áleýmettik jelilerde uzaqqa sozylyp ketken máselege shaǵymdandy: bir aıdan astam ýaqyt boıy olardyń páterlerinde qalypty sý deńgeıi qamtamasyz etilmegen. Sý krannan azdap qana aǵady nemese múldem toqtap tur.

Turǵyndardyń aıtýynsha, sýdyń qysymy turmystyq qajettilikterdi qamtamasyz etýge jetkiliksiz: jýyný, tamaq daıyndaý, kıim jýý múmkin emes.

Ereımentaý aýdany turǵyn úı-kommýnaldyq sharýashylyq bólimi habarlaǵandaı, 2026 jyly 13 aqpanda «Japon granty» aıasynda salynǵan sý kótergish munarada apat bolǵan. Saldarynan sýdy qamtamasyz etetin maıly transformatorlar isten shyqqan kórinedi.

— Apat saldaryn joıý maqsatynda zańnamamen belgilengen tártip boıynsha memlekettik satyp alý konkýrsy ótkizildi. Nátıjesinde merdiger uıym retinde «Kentaý transformator zaýyty» tańdaldy. Qazirgi tańda zaýyt jańa transformatorlardy jasap, Kentaý qalasynan jóneltti. Qazir olar jolda, — dep habarlady turǵyn úı-kommýnaldyq bólimnen.

Qazirgi ýaqytta qaladaǵy sý qubyry júıesi shekteýli rejımde jumys istep tur. Sý jelisindegi qysym shamamen 2,9 atmosfera quraıdy. Ákimshilik ókilderiniń aıtýynsha, bul mınımaldy shekti deńgeı. Degenmen, bul ásirese kópqabatty úılerdiń joǵarǵy qabattaryna turaqty sý qysymyn qamtamasyz etýge jetkiliksiz.

Eske salsaq, buǵan deıin Óskemende sý qubyrynyń tesilýinen turǵyn úılerdiń qabyrǵalary jarylyp jatqany anyqtaldy.