Erevannyń ortalyq alańynda jarylys boldy
ASTANA. 5 mamyr. QazAqparat - Erevan qalasynyń ortalyǵynda ótken Armenııanyń Respýblıkalyq partııasynyń mıtıngi kezinde jarylys boldy, dep habarlaıdy Ýtro.rý.
Stýdentterdiń qoldaryndaǵy gazben toltyrylǵan sharlar jaryldy. Arminfo-nyń habarlaýynsha, bireý sharlardyń biriniń qasyna tutanyp turǵan temekisimen kelgen.
Alańda ol kezde 15 myńnan astam adam bar edi. Respýblıkalyq TJM-niń habarlaýynsha, 144 adam zardap shekken, olardyń kóbi - jasóspirimder, sondaı-aq eki bala bar. Olardyń barlyǵy túrli dárejedegi kúıikter aldy.
Zardap shekkender Kúıik ortalyǵyna, «Armenııa» medıtsınalyq ortalyǵyna, birinshi klınıkalyq aýrýhanasyna jáne «Mýratsan» medıtsınalyq ortalyǵyna jetkizilgen. Balalardy «Sýrb Astvatsatsın» aýrýhanasyna jiberdi.
Armenııanyń TJM-inen jarylǵan sharlar gelıımen toltyrylǵanyn habarlaıdy. Al gelıı ınerttik gaz bolǵandyqtan, jana almaıtyny belgili. Alaıda qaıǵyly oqıǵanyń resmı sebebi ázirshe aıtylmady.
Jarylystar men onyń saldarynan alańda týyndaǵan dúrbeleńge qaramastan, kontsert toqtatylǵan joq, dep jazady Regnum. Tótenshe jaǵdaıdan keıin jarty saǵat ótken soń jınalǵandar aldynda Armenııa Prezıdenti, Respýblıkalyq partııanyń basshysy Serj Sargsıan sóz sóıledi. Sodan keıin ol aýrýhanadaǵy zardap shekkenderge bardy.
